22 — 25 ноябрьыште Волгатехын студентше-влак Роман Карташев ден Дарья Морохина Самара олаште «Прогресс» ракетно — космический рӱдерыште стажировкым эртеныт. Тушко каяш технический направлений дене интеллектуальный олимпиадыште сеҥыше-влакым ойыреныт. Тыгак Самара, Саранск, Ульяновск, Оренбург гыч студент-влак лийыныт.
Стажировко годым студент-влак космический аппаратлан металл гыч тӱрлӧ арверым ямдылыме да моло производство цехыште лийыныт. Заводысо тоштерыш экскурсий дене миен коштыныт. Туштыжо заводышто ыштен лукмо аэропланын, самолётын, ракетын, тӱрлӧ космический аппаратын макетышт ончыкталтыныт. Тылеч посна кумдан палыме конструктор, лётчик, космонавт-влакын историйышт дене палыме лийыныт.
«Прогресс» ракетно — космический рӱдер Российын космический отрасльжым виктарыше ик эн тале предприятийлан шотлалтеш. Тӱнямбалне тудым лидер семын палемдат. Тудо ракетоноситель-влакым космосыш ныл космодром гыч колта.