Кодшо ий мучаште Волгатехын финанс, экономике да экономический факультетын производствыжым организоватлыше кафедрыже ден У педагогический технологий рӱдерже «Статистика» дисциплине дене Всероссийский студенческий олимпиадым эртарен.
Тушто Российысе да Узбекистанысе 10 вуз гыч 50 утла студент ушнен. Олимпиаде кок этап дене дистанционно эртаралтын. Икымше теоретический этапыште ПГТУ-н командыже (Евгения Буйских, Диана Ершова, Дарья Полканова, Яна Ефремова, Анна Филиппова) икымше верыш лектын. Практический этапыште ты команде да МарГУ-н командыже (Анна Степанова, Алина Агачёва, Ангелина Романова, Юлия Гусева, Галина Никифорова) кокымшо верым пайленыт.
Ты кок этапым иктешлымеке, ПГТУ-н командыже кокымшо верым налын. Икымшыште – «МИФИ» национальный шымлыше ядерный университетын Волгодонскысо инженерно-технический институт-филиалже, кумшышто – Волгоградысе кугыжаныш университет.