Ялысе тӱвыра пӧрт пелен чумыргышо ансамбль-влак ял илышыш ямым пуртат. Мураш-кушташ йӧратыше-влаклан йокрокланен шинчаш жап уке. Репетицийышке гына кошташ ит ӧркане! Ты гана Кужэҥер район Старсела ялын тӱзланен, уэмдалт толшо «Тымык кас» коллективше дене палдарыме шуэш. Клуб вуйлатыше Галина Николаевна Жилкина дене мутланышна.
Руш йылмым туныктен
Галина Николаевна – руш йылмым да литературым туныктышо, но илыш корныжым тӱвыра паша дене кылден. Н.Крупская лӱмеш Марий пединститутым тунем лекмеке, Советский районысо Шӱльыдӱр, варажым Ӱшнур школлаште туныктен. Директорын воспитатлыме паша шотышто алмаштышыжлан ыштен. Марлан лектын, кок шочшан лийын.
«Илаш пачерым вигак пуэн огытыл. Старселаште у йочасадым чоҥат ыле. Шоналтышна да 1991 ийыште ешге тышке илаш куснышна. Колхоз мыланна пачерым ойырыш. 2004 ий марте йочасадыште воспитательлан ыштенам, варажым паша укелан кӧра тӱвыра пӧртышкӧ кусненам», – ойла Галина Николаевна.
Икоян коллектив
Клуб пашаеҥ лияш – манаш веле. Усталыкет, чолгалыкет, организатор койышет лийшаш. Пашат еҥ шинчалан койшаш. Галина Николаевнан чыла тидыже уло. Ты кундемыште мураш-кушташ йӧратыше-влак эреак лийыныт. Ончыч клубышто погыненыт, концертлан ямдылалтыныт, но коллектив семын вигак «кӱын шуын» огытыл. Ансамбльлан лӱмым 2010 ийыште гына пуэныт.
«Ансамбльым чумыраш шкенан культорганизаторна, фольклор шотышто специалист Зинаида Витальевна Мамаева дене пырля шоненна. Варажым эркын-эркын ты пашалан пижна. Гармоньчына Александр Николаевич Репин ансамбльлан «Тымык кас» лӱмым пуаш темлыш. Тыге коллектив шочо. Тушто ме 11 еҥ улына: 8 ӱдырамаш, 3 пӧръеҥ. Участник-влакын ийготышт тӱрлӧ. Эн самырыкшылан – 24 ий. Репетицийышке арнялан ик-кок гана погынена. Шкенан концерт программына уло. Такмакым, авторский мурым мурена. Тошто марий, Пошкырт, Одо, Киров кундемласе марий-влакын куштымашыштым шынденна.
Советский, У Торъял, Шернур, Кужэҥер, Параньга районлашке концерт дене коштынна.
Коллективна ик шӱлышан, икоян. Пашашке куанен толам», – ойла Галина Николаевна.
Ик верыште огыт шого
Ансамбль тӱрлӧ конкурсышко, фестивальышке ушна. Кодшо ийын Юрино посёлкышто эртаралтше «Игровой переполох» фестиваль-конкурсышто кумшо верым, Пеледыш пайрем годым лийше «Шокталте гармонетым» конкурсышто кумшо верым, тений февральыште Киров областьыште эртыше «Марий тӱвыра» конкурсышто кокымшо степенян дипломым, Озаҥыште «Premium Art – 2021» тӱнямбалысе конкурсышто икымше верым налыныт. А 2020 ийыште Марий Эл Республикысе тӱвыра, печать да калык-влакын пашашт шотышто министерствын эртарыме «Ял шотан илемыште верланыше эн сай тӱвыра муниципал учреждений» конкурсышто 102 тӱжемаш грантым сеҥен налыныт.
«Грант окса кӱшеш ме 8 мужыр сценический кемым налынна, марий костюмым, 5 руш костюмым, 4 военный костюмым ургыктена, окнашке сакаш тюльым, электролампым налынна», – ойла Г.Жилкина.
Эше «Культура» нацпроект почеш клуб тений у музыкальный аппаратур дене пойдаралтын.
Калыкыште ойлат: «Йӧным мушо йӧрым кочкеш». Старсела клубын пашаеҥже-влак тидым шке пашашт дене пеҥгыдемдат. Ум кычалын, лӱдын-ӧрын от шого гын, кугу кӱкшытыш шуаш лиешак. А «Тымык кас» ансамбльын лӱмжӧ эше кумдан йоҥгалтеш манын, ӱшаныме шуэш.