14 февральыште Кужэҥер район Старсела тӱвыра пӧртыштӧ Коҥга пазар пайрем эртаралтын.
Тушко марий ӱдырамаш-влакын «Саскавий» ушемыштын еҥже-шамыч, Кужэҥер районысо чыла тӱвыра пӧртын пашаеҥышт, Морко районысо Канторъял тӱвыра пӧртын «Весела кумыл» коллективше, Кужэҥер районысо Коҥганур школын тунемшыже-влак, тыгак верысе ял калык погыненыт.
Коҥга – марий калыкын шнуй верже. Тудо суртым ырыкта, эмла, осал деч арала, ешым пукша. Кужэҥер кундемын икмыняр ялыштыже гына ожно Коҥга пазарым пайремленыт. Тидын шотышто поснак Коҥганур, Топкавлак, Изи ден Кугу Чарнур ял-влак ойыртемалтыныт.
Старселаште коҥга пазарым ынде кумшо ий палемдат. Тений тӱрлӧ мастер-классым эртареныт, сӱрет-влак, тыгак коҥга кочкыш ончерлам чумыреныт, чапле концертым ончыктеныт. Тидын нерген Старсела тӱвыра пӧртын вуйлатышыже Галина Николаевна Жилкина дене мутланышна:
– Эн ончыч йочасадыш коштшо да тунемше-влак коклаште коҥга дене кылдалтше «Коҥга – пӧрт аралтыш» районысо сӱрет конкурс эртаралтын. Пайремыште ты конкурс гыч налме эн сай сӱрет-влак ончерым чумыренна. Тыгак «Культура для школьников» программе почеш марий фольклор дене кылдалтше folk урокым эртаренна. Тушто йоча-шамычым марий йӱла, тӱвыра, кочкыш, модыш, вургем дене палдаренна.
Межым кузе ыштыме нерген посна мастер-классым эртаренна. Тушто межым эрыктымым, почкымым, шӱдырымым, тудын дене мом пидаш лиймым каласкаленна, ончыктенна. Тыгак йоча-влаклан сувенир шотан портышкемым ышташ туныктенна. Марий тӱрлызӧ Ираида Степанова шер дене пашам ышташ туныктен. Тыгак шке ыштыме арверже-влакымат конден ыле.
Коҥга пайремын йӱлажым Морко район Канторъял ден Кужэҥер район Йывансола тӱвыра пӧрт-влак ончыктеныт. Пайремыште уна-влакын ямдылен кондымо коҥга кочкышыштым посна ончерыште аклыме. Икымше верыш Старсела, кокымшо верыш Йывансола, кумшо верыш Йӱледӱр тӱвыра пӧрт-влакын пашаеҥышт лектыныт. Варажым Лаждӱр тӱвыра пӧрт гыч толшо-влак дене пырля икмыняр номерым ончыктенна, – мане Г.Жилкина.
