МарГУ-со Медицине институтышто «Лечебное дело» специальность дене тунемше-влакын студент илышышт моткоч оҥай лийын кертеш. Тидымак пеҥгыдемден Татарстанысе Арск олаште шочын-кушшо да кызыт тыште кумшо курсышто тунемше Эльзана Никитина.
Ончыкылык врач-терапевт тӱрлӧ конкурсыш да олимпиадыш школ годсекак кумылын ушна. Чыла тидыже сеҥымашлашке шуаш полшен. Университет тидлан шуко сай йӧным ыштен, тудлан таум гына каласа.
Олимпиадылаште
Эльзана шке сеҥымашлаж нерген кумылын каласкалыш:
– Мый кум ийыште шинчымаш поянлыкем ятыр сеҥымаш да награде дене пойдаралтеш манын шоналтенат кертын омыл. Икымше гана Омскыш миенам. Тушто анатомий дене I всероссийский шошо олимпиаде эртаралтын. Командын капитанже лийынам. Ме кумшо верым налынна.
Кокымшо олимпиадыш кодшо ийын майыште логалынам. Санкт-Петербургышто практический турышто кокымшо верым налынам. Тиде мыланем шинчавӱд йӧре куанымаш ыле, наградым кучыктымо годымсо шижмаш кызытат чоныштем ила.
А шукерте огыл кумшо олимпиадыште, Новосибирскыште, участвоватленам. Анатомий деч посна тыште гистологий дене шинчымашым тергаш йӧн лийын. Вузна гыч кудытын миенна. Кум рвезе анатомийыш ойырен нале, а ме кум ӱдыр – гистологийым. Командына кумшо верыш лекте.
Тыгак Чебоксарыште хирургий дене олимпиадыште кокымшо верым налынам ыле. Теният майыште тыгай таҥасымашыш Уфаш каяш шонем. Тылеч посна вузышто гистологий, анатомий, биохимий дене олимпиадылаште сай результатым ончыктенам.
Пеш чолга
Татар ӱдыр университетысе ятыр таҥасымашыш ушнен. Теве англичан йылме дене эртаралтше кулинар конкурсышто участвоватлен. Тышке Эльзана шке калыкшын кош-теле кочкышыжым ямдылен да тудын нерген, историйжым англичанлакаласкален. Шуко студент кокла гыч ӱдыр икымше верым налын!
Э.Никитина нерген ойлымо годым ешарыман: тудо группыштыжо уста старосто, тӱрлӧ вере участвоватлымыжлан кугу стипендийым налеш. Ректор М.Н.Швецов студент-шамыч нерген паленак шога, нунын дене поро шӱлышан вашлиймаш-шамычым эртара. Эльзанамат тушко ятыр гана ӱжыныт.
Тиде мотор йӱкан студентке вузысо да республикысе шуко мероприятийым: конкурсым, конференцийым да молымат – вӱда. Медицине институтышто тудо Разиль Мухамедьяров дене пырля «Медин Радио» программым почыныт. Кызыт Эльзана тушто вӱдышӧ семын тырша.
Эше школышто тунеммыж годым «Радио» да «Тележурналистике» направленийла дене шинчымашым поген. Тидлан кӧра 2019 ийыште «Артек» йоча лагерьыш миен толын.
Эльзана журналистат лияш шонен, но медицине корным ойырен налын. Туге гынат сценыште лияш тудлан келша. Тиде мотор лӱмым ӱдырлан Дамира коваже пуэн. «Тиде лӱмым тылат Урал гыч конденам. Иктат тыгай лӱман уке», – манын. Тачат тыгай лӱманым студентке вашлийын огыл. Сандене ик оҥай шонымашыже – вес Эльзанам вашлийын мутланаш. Лӱмжӧ тюрк йылме гыч йӱлышӧ тул, а араб йылме гыч волгыдо шӱдыр манмым ончыкта. Эльзана Никитина нине шомаклам тыршымаш да сеҥымаш дене пеҥгыдемда.
Эльвира Терентьева.
Фотом еш альбом гыч налме.