7-13 декабрьыште Угарман областьыште тайский бокс дене Россий Кубок эртаралтын. Ты таҥасымаште Марий Эл Республикысе Олимпийский резерв училищын студентше Никита Чернов сеҥышыш лектын.
Никита Угарман кундем Красные Баки посёлкышто шочын-кушкын. Тысе школышто тунеммыж годым тайский бокслан шÿмаҥын. Рвезе 14 ияшак Россий спорт мастерыш кандидат лÿмым сулен, а 18 ияшыж годым (2019 ийыште) Содружество Кубок верч таҥасымаште спорт мастерын нормативым шуктен да тений тиде суапле лÿмым арален.
– 3-шо классыште тунеммем годым, 2011 ийыште, школышкына тренер-влак толыныт ыле, тайский бокс кружок почылтмо нерген каласкаленыт. Мылам оҥайын чучын. Адакшым мемнан посёлкышто йоча-влаклан яра жапым эртараш йöн шукыжак лийын огыл. Так перныл кошташ огыл манын, йолташ-влак дене пырля тайский бокс дене заниматлаш тÿҥална. Ме Россий мучко тÿрлö турнирыш коштынна, областьыштат таҥасенна. Тылеч посна мый куржталме видыште шкемым шуаренам, – ойла Никита Чернов.
– Марий Элыш кузе логалынат?
– Тренерем Андрей Гарриевич Собко Йошкар-Ола гыч. Угарман кундем марте мемнам туныкташ коштын. 9 классым тунем пытарымекем, тудак мыйым Марий Элыш тунемаш ÿжын. Мый келшенам. Тылеч ончыч Марий кундемын рÿдолаштыже лийше сборыш толын коштынам. Тыште мылам моткоч келшен.
– Илышыштет лийше могай таҥасымаш эн чот ушешет кодын?
– 2016 ийыште Россий Первенствыште кок гана сеҥыше лийынам. Тунам мыйым Тайландыште эртаралтше Тÿнямбал первенствыш колтышт. Тиде жап ушешем эрелан кодеш. Тымарте кеҥеж канышым мый шочмо верыште, пакчаште йыраҥ коклаште эртаренам гын, тунам кеҥежем йотэлыште эртыш. Тайландыште 2016 ийыштат, 2017 ийыштат 1-ше верым налынам.
– Никита, тылат боксышто мо эн нелын чучеш?
– Палемдыме нелыт категорийыш логалаш манын, капкыл нелытым «кучаш» моткоч куштылго огыл. Эре эскераш логалеш. Южгунам кÿчык жапыште 5-7 килом кудалтыман. Тидланже чот тыршыман. Ме кокланже эсогыл спортзалыштак арня дене илена, малаш кодына. Тыште кеч мöҥгысö семын тамле кочкыш ок сымыстаре. Уке гын тутло сийым тамлыде чыташ – манаш веле.
– Тый ынде Россий спортын мастерже улат. Чоныштет могай шижмаш?
– Таҥасымашыш кайыме годым мый уло чонем дене тиде лÿмым налаш ямде лийынам. Кертам манын, шканем ÿшаненам. Шонымашем шукталтын. Тугеже тынар ий тыршымем арам лийын огыл. Тугеже мый илышыште чын корным ойыренам. Ачам-авамын, тренеремын, йолташем-влакын ÿшаныштым суленам.
Но мый ончыкыжат тунемаш, шуаралташ тÿҥалам. Спортсмен-влаклан канен шинчаш ок лий, эре тренировкым ыштыман, у сеҥымашлан эре ямде лийман да кеч-мо лиеш гынат, нигунам вуйым сакыман огыл. У сеҥымаш-влак нерген шоныман. Вес еҥ-шамычлан чапле пример лийман, тыгодым моло деч ойыртемалтын моштыман.