2019 ий годсек регионыштына «Спорт – норма жизни» проект илышыш шыҥдаралтеш. Тудын дене келшышын, Марий Элысе чыла гаяк районлаште ГТО-лан келшыше изи спортплощадке-влакым ыштыме.
А 2022 ий гыч кундемна «Бизнес-спринт (Мый спортым ойырем») федеральный программыш ушнен. Тудын почеш кум «ушан» площадкым ыштыме. Нуным Йошкар-Оласе Самырык-влакын полатыштышт, «Авангард» рӱдерыште, «Бауманский» лицейыште вераҥдыме. Кызытсе илышлан келыштаралтше спортивно-технологический оборудованийым наледыме.
Мероприятий-влак
Тений Марий кундемыште кугу кӱкшытан 389 таҥасымаш лийын: 1 – тӱнямбал, 42 – Российысе да регион-влак кокласе. Таҥасымашке 20 тӱжем утла спортсмен ушнен. Тӱҥ шотышто баскетбол дене Российысе «Оранжевый мяч», спортивный туризм дене йолын коштмаште тӱнямбал таҥасымаш, начарын ужшо спортсмен-влаклан пӧръеҥ-шамыч коклаште мини-футбол (5х5) дене Российын первенствыже эртаралтыныт. Тыгак «Нацийын кроссшо» Российысе куржталмашым Марий Элыште кажне ийын кумдан эртарат.
– Республикыштына чылаже 1752 спорт сооружений пашам ышта. РФ Спорт инистерствын да Марий Эл Республикысе Правительствын полшымышт дене пытартыш вич ийыште районлаште 32 спорт учрежденийым почмо.
– Марий Элыште спортын 64 видыштыже аккредитацийым эртыше 62 спорт федераций шке пашажым шукта.
– Кажне ийын кундемыштына 400 утла кугу таҥасымаш-влак эртаралтыт. Тушечын 30-35 видше Российысе да регионысо статусан улыт.
– ГТО-м тестироватлыше 20 рӱдер уло, тушечын иктыже – паралимпийский резервысе спортивно-адаптивный школышто.
– Спортсмен-влакым 14 организацийыште профессионально ямдылат. Кундемыштына 4 спорт школ (2-шо районышто), 7 олимпийский резерв спорт школ, 1 паралимпийский резерв спортивно-адаптивный школ, 1 спортивно ямдылалтме рӱдер, 1 олимпийский резерв училище. Тушто 4366 спортсмен тунемеш.