Ӱдырамаш-влакын тӱнямбал кечышт вашеш Йошкар-Олаште «А ну-ка, ӱдыр-влак» конкурс эртаралте. Тудын тӱҥ шонымашыже ӱдырамашым профессийыштыже чапландарымаш ыле. Садлан конкурсышто тӱрлӧ профессийыште тыршыше ӱдыр-влак таҥасеныт. Морко районын чапшым тренер-универсал Марина Жолобова арален. Тудым «эн чатката» номинацийыште палемденыт.
Тренер пашам вораҥдара
Марина Морко район Шлань ялыште шочын-кушкын. Школ деч вара Озаҥ оласе институтышто туныктышылан тунемын. Кӱшыл шинчымашым налмыж годымак йоча-влак дене тренировкым эртараш кумылаҥын. Тидлан лӱмын тӱрлӧ курсышто шинчымашыжым пойдарен.
Параньга район Яҥгетсола качылан марлан лекмеке, кок ий утла Сургут олаште иленыт. Туштат Марина йӧратыме пашажым шуктен – тренерлан тыршен. Тыгак кугурак ийготан еҥ-шамыч дене пашам ышташ манын, «таза туп», «подкачка», «чымымаш» йыжыҥла почеш шинчымашыжым нӧлтен. Но тора Сургут гыч чон мӧҥгӧ велыш шупшын. Садлан вате-марий уэш Озаҥыш пӧртылаш шонен пыштеныт.
– Ме кажне арнян ача-авам деке ялыш вашкена. Очыни, тора олаште илымына годым тидыжак мыланна ситен огыл. Озаҥыш пӧртылмеке, ончычсо пашамымак уэш вораҥдараш тӱҥалынам. Шочмо ялыштем илыше ӱдыр, ӱдырамаш-влак тренерлан пашам ыштымем паленыт. Варажым нуныланат тренировко-влакым эртараш йодыныт. Тыге Шлань клубышто каныш кече годым погынаш тӱҥалынна. Кызыт арнялан кок гана тренировкым эртарем. Жап да йӧн лийме годым арня покшелне толын каем, уке гын, кугарнян да рушарнян погынена. Занятийыш лу наре ӱдырамаш коштеш. Нунын дене, таза капкылан лияш манын, тӱрлӧ упражненийым муро почеш ыштена, – каласкалыш Марина.
Жапым моштен кучылтеш
Кундемнан эн чатката ӱдыржӧ изинек чолга кушкын. Тӱрлӧ мероприятийыште усталыкше дене ойыртемалтын. Марина тыгак мураш, кушташ, мероприятий-влакым вӱдаш кумылан. Шукерте огыл ачажын лӱмгече касшым уна да родо-влаклан эртарен.
– Школышто тунеммем годым яра шинчымем омат шарне. Лийже тиде иктаж усталык але спорт мероприятий – чыла вере шуаш тыршенам. Шлань клубысо «Эр кече» ансамбльын участницыже улам. Тудын дене ятыр вере концертым ончыктенна. Кызытат жапым моштен кучылтам. Шукерте огыл районыштына «Морко ӱдыр – чолга шӱдыр» моторлык конкурсышто шкем тергенам ыле. Пашазе профессиян ӱдыр семын мыйым Морко районын чапшым республикысе «А ну-ка, ӱдыр-влак!» конкурсышто аралаш ойыреныт, – мане М.Жолобова.
Шонымаш кугу
Ӱдыр ончыкылыклан кугу шонымаш дене ила. Тудо шке пашаж верч йӱла. Шуктымо сомылжын кӱлешлыкшым Марина конкурс годым ончыктен.
– Ялысе йоча-влакымат тренировкылан кумылаҥдаш шонем. Вет кызыт шуко икшыве телефонышто але гаджетыште шинча. Тидын дене тазалыкшылан кугу эҥгекым ышта. Садлан йоча жапым пайдалын эртарыже, мӧҥгыштӧ тыглай ынже кий манын, ты шонымашым илышыш шыҥдараш шонем, – палдарыш ӱдыр.
Маринан кажне татше могай-гынат событийлан поян. Тренировко деч посна тудо ялысе тӱрлӧ сомылым вораҥдараш полша. Вет ача-аваже ятыр вольыкым, чывым ашнат. Тыгак кажне каныш кечылаште имньым кычкен кудалыштеш. Очыни, самырык еҥ тыгаяк лийшаш: весела, кумылзак, чыла вере шуаш тыршыше да нимо деч лӱддымӧ!
М.Жолобован альбомжо гыч налме фото.