Республикыштына пытартыш ийлаште спорт койын вияҥеш: ятыр спортплощадке ышталтеш, спортивный мероприятий-влак эртаралтыт. Кундемыштына спортын вияҥмыж нерген Марий Эл Республикысе спорт, туризм да молодёжный политике министр Лидия Батюкова дене мутланенна.
– Лидия Александровна, республикыштына спорт дене кылдалтше пашам кузерак акледа?
Пытартыш вич ийыште ятыр паша ышталтын: республикыштына физкультур да тазаҥдыме комплексым чоҥымо, 10 изирак спортплощадкым (ГТО), 3 физкультур комплексым, 6 стадион-площадкым, 2 стадионым ыштыме, футболла модаш ик пасум тӧрлымӧ, кок лыжероллерный трассым йӧнештарыме.
Кундемыштына спортын 56 видше дене 54 аккредитоватлыме спорт федераций пашам ышта. Нунын полшымышт дене республикыштына кажне ийын 500 утла физкультур да спорт мероприятий эртаралтеш. Кугураклан ече дене таҥасымаш, куштылго атлетике, футбол шотлалтыт.
Регионыштына йоча да юношеский спортлан вияҥашыже спорт инфраструктур, спорт тӧнеж-влак, материально-технический базе уэммаш, физкультурный да спортивный мероприятий-влакым эртарымаш, коммерческий огыл ушем-влак полшат.
– Районлаште могай паша ышталтеш? Ончыкыжым у спортивный школым почаш шонымаш уло?
– Республикысе ола ден районлаште Спорт министерствын 6 учрежденийже шке программыжым илышыш шыҥдара. Отделений-влак спортын 9 видше дене пашам ыштат: ече дене куржталмаш, биатлон, пуля дене лӱйкалымаш, грек-рим кучедалмаш, дзюдо, бокс, байдарке да каноэ дене иймаш, хоккей, футбол.
Тений Спорт гимнастике дене олимпийский резерв школ пелен «Художественный гимнастике» да «Эстетический гимнастике» пӧлка-влак почылтыныт.
– Марий Элысе спортсмен-влакым ончыкыжым тӱнямбалысе таҥасымаште, тыгак Олимпиадылаште ужын кертына?
– Республикыштына ӱшаным пуышо шуко тале спортсмен уло. Нуно Российысе да тӱнямбалысе таҥасымашлаште Марий Элын чапшым аралат. Нунын коклаште – Европын чемпионжо, байдарке да каноэ иймаш дене Российын сборныйыштыжо таҥасыше Артем Коровин. 2024 ийыште Парижыште XXXIII кеҥежымсе Олимпиадыште Российын чапшым аралаш тӱҥалеш манын ӱшанена.
Умбакыже газетнан у номерыштыже лудса.