
Параньга район Элпанур ялыште шочшо, Медведево район Юбилейный посёлкышто кушшо Геннадий Николаев изинек спортым йӧрата. Тудо куштылго атлетике дене заниматла, футбол дене сайын модеш, ече дене мунчалта. Но эн чотшо ӱстел теннислан кумылан. Таче тудо ПГТУ ден МарГУ-што физкультурым туныкта, ӱстел теннис дене тренер. Тыгак МарГУ-со физический культур, спорт да туризм факультетыште аспирантурышто тунемеш.
Вич ияшак – коньки дене
Геннадийын ачаже физкультурым, аваже математикым туныктеныт. Рвезе моткоч писе, чулым кушкын. Вич ияшак коньки дене кошташ, ече дене мунчалташ тӱҥалын.
– Спортсмен семын вияҥаш мыланем ече таҥасымаш кугун полшен. Ачам Михаил Васильевичын, надырже кугу. 8-ше классыште тунемме годым тудо мылам физкультурым туныкташ, тренировкым эртараш ӱшана ыле. Тунамак туныктышо, тренер лияш негыз пышталтын.
Юбилейный посёлкысо школышто 1990-ше ийла мучаште самырык да тыгодым опытан туныктышо, тренер-влак пашам ыштеныт. Сандене спортын тӱрлӧ видше дене келге шинчымашым налынам: футбол, баскебол дене модынам, ече дене коштынам, куштылго атлетике, ӱстел теннис дене заниматленам, эсогыл музыкальный школышко баян классышке коштын шуктенам, – мане Г.Николаев
8-ше класс деч вара Геннадий Руэм посёлкысо шуко профилян лицей-интернатышке физике да математике классыш тунемаш пурен. Тыште спорт изиш ӧрдыжеш кодын гынат, школысо стадионышто футбол, тӱшкагудышто ӱстел теннис дене жапын-жапын модын.
Мардеж гай писе
2005 ийыште тудо ПГТУ-шко лесопромышленный факультетышке стандартизацийын инженерже специальность дене тунемаш пурен. Студент годым уэш спортышко пӧртылын.
– Тыште куштылго атлетике, ӱстел теннис дене умбакыжат заниматлаш тӱҥалынам. Вузын сборный командыже Яльчик ер воктенысе спорт да тазалыкым пеҥгыдемдыме «Политехник» лагерьышке спортивный сборышко лектын коштын. Тушто тренер Владимир Германович Соколов мыйын писын куржталыштмем ужын да куштылго атлетике дене тренировкышко ӱжын. 4×100 м дистанцийым эстафете дене эртыме тӱшкашке пуренам, Марий Элын кубокшым сеҥен налынна. Тыгак Российысе паша коллектив-влак коклаште лийше спартакиадыште 100 м дистанцийым куржмаште той медаль дене палемдалтынам, – мане тудо.
Инженер олмеш тренер
Г.Николаев, дипломым налмеке, Медведево посёлкысо спорт школышто ӱстел теннис дене тренерлан ышташ тӱҥалын.
Умбакыже материалым 25 февральыште лекше номерыште лудса.