12 январьыште Параньга районысо Ондропсолаште картинг дене трассыште таҥасымаш лийын. Тудым Матародо кундемысе активист, ончычсо да кызытсе картингист-влакын инициативышт почеш илышыш шыҥдарыме.
Мероприятий Параньга районышто картинг спортым вияҥдымылан негызым пыштыше, Матародо кыдалаш школын туныктышыжо, сай организатор М.Медведев лӱмеш эртаралтын.
Участник-шамыч кандаш тӱрлӧ видыште таҥасеныт: изирак-шамычлан келыштаралтше «Дружба» класс гыч тӱҥалын эн кугу скоростян «Ротакс» класс марте. Тыгайже, мутат уке, 18 ияш деч кугурак-шамычлан келыштаралтын. Чылаже 94 авто ты таҥасымашышке ушнен. Участник-влак Татарстан, Марий Эл гыч лийыныт. Матародо кундем гыч 15 машина трассыш лектын.
Землякна Р.Мустафин «Пионер» классыште ойыртемалтын, кокымшо вер дене палемдалтын. Тыгак М.Полатов сай результатым ончыктен. «Ротакс» да «Минск-тюнинг» машина-влак дене чылам ончылтен да кок шӧртньӧ медальым сулен. А.Петров «Минск-стандарт» классыште кумшо лийын.