– ойла Йошкар-Олаште шочын-кушшо, МарГУ-што физический культур, спорт да туризм факультетыште магистратурышто тунемше Мария Петухова.
Тудо кеҥежымсе полиатлон дене Россий чемпионатлаште, тыгак Тӱнямбал первенствыште таҥасен, сеҥыше радамыште лийын.
Изиж годсек лывырге
Маша изиж годсек спортлан шӱмаҥ кушкын. Писе, чулым да тыгодым лывырге йоча лийын. Йочасадыш коштмыж годымак художественный да спортивный гимнастике дене заниматлен, кид-йолжым, капкылжым лывыртен.
«2-шо классыште тунеммем годым иймаш дене кылдалтше олимпийский резерв школышко (СДЮСШОР) йоча-влакым погеныт. Мемнан рӱдоласе 19-ше №-ан школышкат ӱжаш толыныт ыле. Тушко кайыде шым чыте. Отборым эрташ гимнастикыш коштмем кугун полшен. Тушто капкыл лывыргылыкым тергеныт. Ме эн ончыч Йошкар-Оласе «Дельфин» бассейнышке, варажым Вӱд полатышке коштынна. Иймаш дене республикысе тӱрлӧ таҥасымаште лийынам», – ойла М.Петухова.
Тура лӱйкалаш, писын куржталаш
Кугурак лиймеке, Мария спортын вес видыштыже шкенжым терген ончен. Ончыч школысо тирыште лӱйкалаш тунемын, 8-ше классыште тунеммыж годым куштылго атлетике дене заниматлаш тӱҥалын.
«Тренер Виталий Владимирович Воронцов школышто 5-6-ше класслаште тунемше-влак коклаште куштылго атлетке дене заниматлаш кумыланше ӱдыр-рвезе-влакым поген. Кугурак ийготан лийынам гынат, мыйым нальыч. Шкенан школышто, варажым «Арена Марий Эл» манежыште тренироватлалтынам», – мане ӱдыр.
Полиатлон сымыстарен
Ӱдырын мастарлыкшым, моло деч виян улмыжым тренер В.Воронцов шекланен шуктен. Мария куштылго атлетикыште сай лектышым ончыктен. Тудын эше сайын лӱйкален, ийын моштымыжым пален налмеке, тренер кеҥежымсе полиатлонышто шкем терген ончаш темлен.
8-ше классым тунемын пытарымек, Мария Марий Элыште эртыше спортын ты видше дене эртыше чемпионатыше икымше гана таҥасен да вигак сеҥышыш лектын. 11-ше класс деч вара Российысе чемпионатыште ойыртемалтын да Россий сборныйын составышкыже логалын.
Инженер лияш шонен
Спортым йӧратыше ӱдыр инженер лияш шонен, но варажым садак спорт дене кылдалтше профессийым ойырен налын. 2017 ийыште МарГУ-шко физический культур, спорт да туризм факультетышке тунемаш пурен.
«Тыште мо шотышто сай? Физкультур дене кылдалтше шуко предметым тунемынна, тыгодым эше тренировко-влак чӱчкыдын лийыныт. Капкылым вияҥдаш йӧн ыле. Чыла тидыже сай кӱкшытыш шуаш шӱкалтышым ыштен», – пелештыш ӱдыр.
Тӱнямбал Первенствыште
Студент пагытыште кеҥежымсе полиатлон дене утыр чулымештын. Кажне ийын Российын чемпионатышкыже коштын да сай результат дене пӧртылын. А тений кеҥежымсе полиатлон дене тудо икымше гана тӱнямбал первенствыште таҥасен.
«Российысе тыгай чемпонатыште четырёхборье да куржталмаш дисциплиныште ӱчашенам. 2018 ийыште, 2-шо курсышто тунеммем годым, Калуга олаште эртыше тыгай чемпионатыште 19-20 ияш ӱдыр-влак коклаште икымше верым налынам, спорт мастерыш кандидат лийынам. Вес гана Новочебоксарскыште, Йошкар-Олаште эртаралтше тыгай шотан чемпионатлаште кокымшо я кумшо верла дене палемдалтынам. Тений сентябрь мучаште спортын ты видше дене Чебоксарышке таҥасаш миен коштынам да икымше вер дене пӧртылынам», – ойлыш М.Петухова.
Тений апрельыште тудо тыгак Белоруссийыште эртыше первенствыште таҥасенам да 21-23 ияш ӱдыр-влак коклаште икымше верым налын. Тушто Казахстан, Белоруссий, Россий гыч спортсмен-влак лийыныт. Таҥасымаш кум кече шуйнен.
«Спорт – мыйын йӧратыме пашам. Тидын дене илем, сандене сеҥымашке шуаш тунар чот неле огыл. Спорт мылам куатым пуа, тазалыкым пеҥгыдемда», – иктешлыш Мария.
Кызыт тудо йочасадыште изирак воспитательлан пашам ышта, ончыкшым воспитатель лийнеже. Тыгак Йошкар-Оласе «Благовест» архиерейский черке хорышто визымше ий мура. Ончыч Рушарня школышто ямдылалтын, Юмылан ӱшанжым пеҥгыдемден. Яра жапше годым ола мучко йолын коштеш.
Ончыкыжымат Маша Российысе спорт таҥасымашлаште Марий кундемнам чапландара манын ӱшанена.