Республикыштына физкультур да спорт дене заниматлаш чыла йӧным ышташ, спорт объект-влакым шукемдаш тыршат. Тидлан «Демографий» нацпроектын «Спорт – норма жизни» регионысо проектше полша.
Идалык мучаш марте 13 спорт объектым чоҥен да пашаш колтен шуктыман. Тидлан 372 млн оксам ойырымо. Мутлан, Юрино посёлкышто да Козьмодемьянскыште стадион-влакым, Приволжский посёлкышто физкультурым да тазалыкым пеҥгыдемдыме комплексым ыштыме. Тыгак Оршанке, Параньга, Шернур, Советский, Волжский районлаште да Волжск олаште 11 миллионаш хоккей борт-влакым шогалтыме. Тыгак коньки-влакым шумаш электрический заточкым, 100 мужыр коньким кошташ келыштарыме сушилкым, электрон таблом кондымо.
1 сентябрьлан Волжск олаште ФОК-ым чоҥен шуктышаш улыт. Тыгак тыште ечероллер корно лиеш. 15 сентябрьлан Звенигово район Красногорский посёлкышто искусственный шартышан футбол пасум ыштен шуктышаш улыт.
Тидыже ялыште искусственный шартышан икымше пасу. Тидлан 20 млн теҥге окса ойыралтын. Оршанке районышто сентябрь мучашлан ГТО площадке ямде лийшаш.
Спортын базовый видше-влак дене ямдылыме 11 спорт учрежденийлан 21 миллионаш спорт арверым, экипировкым да электронный интерактивный тренажёр-влакым налме.
Республикыште уста спортсмен-влаклан полшаш 300 тӱжем теҥгем ойырымо. Тушеч 7 спортсменлан оксам пуымо.
Валентина Семёнова.