12 декабрьыште МарГУ-што «Мисс sport & beauty» («Спортын да моторлыкын миссше») конкурс лие. Тушто ты вузын тӱрлӧ факультетыштыже тунемше индеш ӱдыр таҥасыш.
Конкурсант-влак спортышто, хореографийыште тӱрлӧ сеҥымашыш шуыныт, тӱрлӧ национальностян да шонымашан улыт. Нуно ты шоум ончыкташ ик тылзе ямдылалтыныт: «Спортклубышто» заниматленыт, подиумышто кошташ тунемыныт, кочкаш шолтеныт, тазалыкым тергыше рӱдерысе мастер-классыште, моло мероприятийыштат пырля лийыныт. А вара шке мастарлыкыштым сценыште ончыктеныт. Эн ончычак зритель-влаклан кажне участнице нерген каласкаленыт – тыгодым ӱдыр-влак чыланат икгай тувыр дене лийыныт. Варажым, икгай спорт вургемым чиен, спорт дефиле номерыш пырля лектыныт. А творчествым ончыктымо годым кажныже вестӱрлӧ лийын: икте куштен, весе спортивный упражнений-влакым ончыктылын, кумшо почеламутым лудын. Вара адакат чылаштымат ош тувыр дене ужна да Юмынӱдыр улмыштым умылышна.
«Мисс sport & beauty» лӱмым Ксения Михеева нале. Тудо физический культур, спорт да туризм факультетын икымше курсыштыжо тунемеш. «Чылажат йоча жапысе пагыт семынак: тыгак куанем да илем, тунамсе семынак пистолет прицел гыч ончалын, атакышке, тулышко лекташ ямде улам. Велосипед дене кудалышташ йӧратем, а вӱдыштӧ шкем Вӱдия семынак шижам. Теҥызым йӧратем, тудын ловыктен модмыжым шагат дене колышт кертам», – каласкалыш шкеж нерген Ксения.
Тиде сӧрал ӱдыр моторлык шотышто эталонжылан киноактрисе Анжделина Джолим шотла. Илышыште весылан пиалым кондаш шонымаш дене ила. «Спорт – вийым, чытышым йодшо паша, тыгодым уло чон дене куанет да эше – тиде шкемым чотак тергыше сомыл», – ойла мисс.
Ты титул деч посна Ксениялан йӱклымаш почеш Ончышо-влакын призыштым пуышт, тыгак «Мисс целеустремленность» лӱм дене палемдышт.
«Вице-мисс sport & beauty» лӱм экономике, управлений да финанс факультетын 3-шо курс студенткыже Мария Устыменколан логале. Тудо шке мутшым кучышо, чолга, тунемаш тыршыше еҥ, садланак йолташыже-влак старостылан ойыреныт.
«Тылеч ончыч ик моторлык конкурсыштат участвоватлен омыл, но, йолташ ӱдырем-влакым ончен, мыйынат тыгай шонымаш шӱм-чоныштем илем. Шонымашем шуктышым, вет мый спортым йӧратем», – вашештен пресс-конференцийыште мыйын йодышемлан Мария.
Ӱдыр шинчаже начар улмылан кӧра 9-ше класс марте нимогай таҥасымаште участвоватлен огыл. А вара сайын ужаш манын, ача-аваже тудым бадминтоныш колтеныт. Кызыт Мария – бадминтон дене МарГУ-н сборныйыштыжо, 15 наградыже уло.
М.Устыменком тыгак «Мисс очарование» лӱм дене палемдышт.
«Мисс интеллект» лӱмым Индий гыч тунемаш толшо Бхавна Кочрекарлан пуышт. «Мисс грация» Анна Мамаева лие, «Мисс артистичность» – Юлия Инягина, «Мисс талант» – Мария Казакова, «Мисс Олимпия» – Анастасия Скатова, «Мисс стиль» – Татьяна Кондратьева, «Мисс душа народа» – Полина Шустова.
Пӧлек шуко да моткоч шкешотан ыльыч. МарГУ-н ректоржо М.Швецоват вуз деч пӧлекым сӧрыш – тидлан ӱдыр-влак иктаж-могай тунемме курсым ойырен налшаш улыт, а курсым вуз тӱла.