Налог шотышто федеральный службын Марий Эл Республикысе пресс-службыжо умылтара:
– 2022 ий 1 январь гыч физкультур-тазаҥдыме услугылан роскотым ыштыме гыч социальный налоговый вычетым (13 процент) налаш лиеш. Но спортлан идалыкыште кучылтмо эн кугу роскот 120 тӱжем теҥге деч шуко лийшаш огыл. Ты кугытышкак НДФЛ почеш моло социальный вычетат (эмлалтмылан, тунеммылан) пурталтеш. Ийготыш шудымо йоча олмешат тыгай оксам пӧртылтен кертыда.
Вычетым налаш манын, физкультурно-спортивный организаций (индивидуальный предприниматель) да тӱлымӧ физкультур-тазаҥдыме услуго Россий Правительствын кажне ийын пеҥгыдемдыме спискышкыже пуртымо лийшаш.
Спортлан 2022 идалык мучко ыштыме роскотлан гына вычетым налаш лиеш, вет закон 1 январь гыч гына илышыш пурен. Тидлан налог органыш 3-НДФЛ формо почеш 2022 ийлан налоговый деклараций, роскотым пеҥгыдемдыме документ-влак (физкультур-тазаҥдыме услугым налмылан договор да кассовый чек), оксам кусараш банковский реквизит, йочан шочмо кагазше (йочан спорт занятийжылан ыштыме роскот гыч вычетым пӧртылтынеда гын) кӱлыт.
Налоговый декларацийым да документ-влакым налог органыш 2023 ий 1 январь деч вара пуыман. Тидым тыгак налог органын сайтыштыже (www.nalog.gov.ru) «Личный кабинет налогоплательщика для физических лиц» сервис гоч ышташ лиеш.
Вычетым пашам темлыше дечат 2022 ий мучко налаш лиеш.