Спорт аланыште сай кышам коден…

Арамлан огыл калыкыште ойлат: «Айдемым кужу але кӱчык ӱмыржӧ дене огыт акле». Тиде ой Морко кундемын ик эн чолга эргыже, спорт аланыште кугу чапым сулышо Сергей Романович Александровлан тӱрыснек келшен толеш.

Морко район Кораксолаште шочын-кушшо рвезылан спортышто шуаралташ Шӱргыял школ полшен. Пӱрымашын йогынжо дене тудо эре ончыко чымен. Тыге Марий Эл Республикысе физкультурын да спортын отличникше, спорт мастерын кандидатше марте кушкын шуын. Чаманен каласыман, ты волгыдо шӱм-чонан, патырле вий-куатан тале тренерлан ты ош тӱняште пел курым веле илаш пӱралтын улмаш.

21 мартыште Сергей Александровым шарныме лӱмеш шочмо Кораксола ялыштыже верланыше Шӱргыял школ пелен ече дене республикысе таҥасымаш эртаралте. Тыгай суапле мероприятийым эртарен колташ шке жапыштыже Шӱргыял школын директоржо, варажым ты чолга тренер дене пырля пашам ыштыше Е.Н.Гаврилов ойым пуэн. Тудын шонымашыж дене Морко районысо спорт аланыште тӱҥ судьян пашажым шуктен шогышо В.В.Иванов тӱрыс келшен да полыш кидым шуялтен. Эн ончыч районышто веле ты таҥасымаш эртаралтшаш улмаш. Варажым, Сергей Романовичым порын шарнен да пашажым кӱкшын аклен, республикнан тӱрлӧ кундемже гыч спортсмен-влак толыныт. Поснак Марий Турек район ты шотышто чолгалыкшым ончыктен.

Ты кечын тӱрлӧ ийготан 150 ечызе вий-куатшым терген. Нунын коклаште С.Александровын тунемшыже, я пырля пашам ыштыше коллегыже, я тудым сай иза-шольо семын пагалыше шерге йолташыже-влак лийыныт.

С.Р.Александровым шарныме лӱмеш пӧлеклалтше республик кӱкшытан ече дене таҥасымашым эртарен колтымаште моткоч кугу надырым пыштеныт: Морко районысо культур, спорт да туризм пӧлка, «Газпром Трансгаз Нижний Новгород» ЛПУМГ-н Морко филиалже, «Морко ЦФКС» спорт пӧлка, Морко АТТ, Морко ола шотан илем администраций, Шӱргыял школым вуйлатыше ден школ коллектив, «Электро» кевыт вуйлатыше И.А.Васильева, амалкалче М.Чернова, тыгак Э.В.Никитина, С.А.Каменская, И.Иванов, А.А.Петров, Н.Н.Романов, А.В.Микаков да молат. Ты кечын кажне ечызе Шӱргыял школышто физкультурым туныктышо Е.Н.Гаврилов ден уста тренер Ю.Р.Александровлан пеш чапле трассым ямдылымыштлан тау мутым каласен. А сеҥыше-влакын кумылыштым чап кагаз дене пырля кучыктымо шергакан шарнымаш пӧлек нӧлтен.

Елена Григорьева, Шӱргыял школын вожатыйже.

Снимкыште: С.Р.Александровлан пӧлеклалтше республик кӱкшытан таҥасымашын эн чолга участникше-влак чап кагаз да шарнымаш пӧлек дене.