Кодшо арнян Марий Эл Республикым Вуйлатыше Ю.Зайцев Украиныште спецоперацийыште участвоватлыше военнослужащий-влакын ешыштлан ешартыш социальный полышым пуымо шотышто указым луктын. Туддеч вара ты йодыш дене республикыште частичный мобилизацийлан полшымо шотышто координационный советын заседанийжым эртарен.
Ончылно улына
Ешартыш социальный полышым пуаш палемдыме шотышто республикна Юл кундем федеральный округышто ончылно кайыше вич субъект коклашке логалын.
Регионышто мобилизоватлыме еҥ-влаклан пуаш пеҥгыдемдыме 50 тӱжем теҥге выплатым 28 октябрьлан 1537 еҥлан тӱлымӧ.
Республикыштына беженец ден мобилизоватлыме еҥ-шамычын ешыштлан гуманитарный полышым пуаш 30 сентябрь гыч 28 октябрь йотке чылаже 64,3 миллион теҥгем погымо. Тиде окса дене министерстве мобилизоватлыме еҥ-влаклан кӱлешан сатум налеш.
Тыгак частичный мобилизаций почеш военный службыш налме еҥ-влакын ешышт дене паша ышталтеш. Кызытеш 1388 ешлан социальный паспортым ыштыме, 1175 ешым патронажыш налме. Еш-влак медорганизацийлашке возалтме, инвалидностьын группыжым пеҥгыдемдыме, икшывым йочасадыш пуымо, школышто яра пукшымо, кеҥежым лагерьыш канаш путёвкым налме, тыгак психологический полыш шотышто нелылык нерген каласеныт. 79 ешлан олташ пу кӱлеш. 388 ешым кредит каникул йодыш тургыжландара. Тидын шотышто банк-влак дене мобилизоватлыме еҥ-влакын ешыштлан консультацийым писын пуаш посна еҥым палемдаш кутырен келшыме.
Ийготыш шудымо-влаклан «Журавушка» социально-реабилитационный рӱдерыште каналташ да тазалыкым пеҥгыдемдаш йӧным ыштыме. 1 ноябрь гыч тушто эше 17 йоча кана.
Социальный вияҥмаш министерстве мобилизоватлыме да спецоперацийыште участвоватлыше военнослужащий-шамычын ешыштлан социальный полышым пуымо шотышто книга-памяткым луктын.
Тазалык
Марий Эл Российын шке медпаша-еҥже-влакым Донецк ден Луганск калык республиклашке, Запорожский ден Херсон областьлашке йоча-влакын тазалыкыштым тергаш колтышо 20 субъект радамыш пурен. 13 еҥан педиатрий бригадым 30 октябрьыште Йошкар-Ола гыч палемдыме верлашке ужатыме.
Бригадын чыла медицине оборудованийже ден кучылташ кӱлшӧ материалже улыт. Тидлан республикысе Правительствын резерв фондшо гыч 1 миллионат 120 тӱжем теҥгем ойырымо.
Спецопераций гыч пӧртылшӧ-влак медполышым эмлымверлаште черет деч посна налын кертыт, тыгак реабилитацийымат министерствын ведомствыштыже улшо тӧнежлаште эртен сеҥат.
Мобилизоватлыме граждан-влакын ешыштлан диспансеризаций ден профосмотр эртаралтыт. Тыгак йоча-шамычлан (показаний улмо годым) Волжский район Кичиер посёлкысо эмлымверыште эмлалташ да каналташ йӧн ышталтеш.
Йочасадыш – черет деч посна
Марий Элым вуйлатыше Ю.Зайцевын кӱштымыж почеш мобилизоватлыме да спецоперацийыште участвоватлыше еҥ-влакын шочшыштым йочасадлашке черет деч посна налшаш улыт.
Науко да образований министрын пашажым шуктышо Л.Ревуцкая палемден: тыгай еш-влак йочасадлаште икшывым ончымылан тӱлымӧ деч утаралтыт. Тыгак ийготыш шудымо йоча-влак ешартыш образованийым пуымо организацийласе кружоклаш, секцийлаш да моло занятийыш яра коштын кертыт.
Яра пукшат
5-11-ше класслаште, техникум ден колледжлаште тунемше-влаклан шокшо кочкышым ик гана яра пукшат.
Кундемыштына спецоперацийыште улшо еҥ-влакын ешышт гыч 996 йоча школ деч ончычсо, общий да кӱшыл образований программе почеш образовательный тӧнежыш коштеш, 43 йоча – профессиональный образовательный организацийыш. Чыланат шокшо кочкышым яра кочкыт. Тыгай тӱшка кокла гыч кум студент тӱлен тунемын гын, ынде оксам огыт тӱлӧ.
Тыгак вузлаште тыгай еш гыч йоча-влаклан 2000 теҥге стипендийым тӱлаш палемдыме. Кызыт ныл студентлан тӱлалтеш.
Спорт тӧнежлаш яра
Украинысе спецоперацийыште участвоватлыше военнослужащий-влакын ешышт Марий Элысе спорт сооруженийлашке яра коштын кертыт. Регионышто Спорт да тазалык кечым эртарыме годым тыгак спорт сооруженийлашке спецоперацийыште ӱмыр лугыч лийше военнослужащий-шамычын, ДНР ден ЛНР, Запорожский да Херсон областьлаште тыршыше волонтёр-влакын лишыл еҥышт, тыгак тиде субъектлашке колтымо (командироватлыме) еҥ-шамыч пурен кертыт.
Пункт-влак лийыт
Тиде заседанийыштак мобилизоватлыме граждан-влакын ешыштлан социально-психологический полышым пуымо пункт-шамычым почаш темлыме.
Нуно республикнан кажне олаштыже да районыштыжо лийыт. Тушто психологический службын специалистше, тазалыкым аралыме, образований, молодёжный политике, социальный вияҥмаш, духовенстве аланла гыч еҥ да волонтёр-шамыч пашам ышташ тӱҥалыт.
Мобилизоватлыме еҥ-влакын ешыштлан психологический полышым пуымо рӱдерым МОСИ-ште почыт, увертарен вузын ректоржо И.Загайнов.