Кодшо кечылаште Марий Элым Вуйлатыше Ю.Зайцев Шочмо элым аралыше-влакын ешыштын комитыштын регионысо штабше дене вашлийын мутланен.
Вашлиймашыште СВО участник-влак ден нунын ешыштлан полыш, добровольческий формированийын участникше-шамычлан полыш нерген ойленыт. Тыгак регионысо штабын Кугу Отечественный сарыште сеҥымылан 80 ий темме вашеш мероприятийже-влакым палемденыт, «Жена Героя. Мать Героя. Марий Эл» проектым шуйымым пеҥгыдемденыт.
Штаб 2023 ий 4 февраль годсек пашам ышта. Тудым Ирина Багаева вуйлата. Тушто юридический, илыш дене кылдалтше, гуманитарный, психологий да духовный сынан полышым пуат. Тушто шым психолог пашам ышта, тӱшка да посна занятийым, консультацийым эртара. Тений штабыш 400 утла йодмаш пурен.
Ты ийын СВО участник-влакын ешыштым Москош, Санкт-Петербургыш, Озаҥыш намиен коштыктеныт.
Регионысо штаб самырык тукымлан Патырлык урок-влакым эртара, тӱрлӧ датылан пӧлеклалтше мероприятийлашке ушна.
А тӱҥжӧ – СВО-што улшо военнослужащий-влакын ешыштлан полша. Вашлиймаш годым Ю.Зайцев штабым вуйлатыше И.В.Багаевалан Россий Федерацийыште Айдемын праваже шотышто уполномоченныйын тауштымашыжым кучыктен.