Радиоэлектронике аланлан пашаеҥ-влакым ямдылаш Марий Эллан 100 млн наре теҥгем ойырат.
Марий радиомеханический техникум «Профессионалитет» федеральный проектын грантшым сеҥен. Техникум федеральный бюджет гыч 100 млн теҥгем налеш, республикысе бюджет гыч 15 млн теҥгем налеш, тыгак экономике секторысо партнёр-влак 12,8 млн теҥгем пуат. У туныктымо программе-влакым илышыш пуртымо мероприятий-влак, кызытсе жаплан келшыше оборудований, техникум ден экономике сектор дене пырля тыршыме РФ Президентын шындыме задачыжым – «Профессионалитет» проектым шаркалаш да кӱкшӧ квалификациян кадрым ямдылаш – шукташ полшат.
«Радиоэлектроника-РМТ» образовательно-производственный рӱдерыш (кластерыш) РМТ деч посна эше кум сетевой туныктымо организацийым да куд партнёр-предприятийым (ММЗ, ЗПП, «Потенциал» ООО, «Инструмент-Н» ООО, «Автограф» компаний, «Российская телевизионная и радиовещательная сеть» ГУП-н филиалже) пуртеныт.
Марий Элым Вуйлатыше Ю.Зайцев палемден: республикыштына «Кластер радиоэлектроники России» проект илышыш пурталтеш. Туныктымылан да стажировкым эртымылан базым ыштыме сай специалист-шамычым ямдылаш полша.
Марий радиомеханический техникум шкешотан лабораторийлан шотлалтеш. Тушто туныктымаште у направлений-влакым, у туныктымо технологийым кучылтыт. Лишыл жапыште техникумышто олмыктымо пашам тӱҥалыт. Январь гыч «Профессионалитет» федеральный проект почеш мероприятий-влакым эртарат.