Советский районысо Ургаш лицей воктене самырык-влак специальный военный операцийысе участник-влак лӱмеш аллейлан негызым пыштеныт.
Ургаш лицейын биологий да химий направлениян классыштыже тунемше-влак шке туныктышышт дене пырля, тыгак «Добро» толкынын волонтёржо-влак пушеҥгым шынденыт.
Икымше вич канде кожым 11-ше классыште тунемше Денис К.-ын аваже пуэн. Ача да пелаш кодшо ий годсек – СВО-што. Ондак лесничий лийын, лицейлан кушкыл дене эре полшен.
Ты лицейыште выпускник-влакымат шарнат. Кызыт 30 наре ончычсо тунемше спецоперацийыште участвоватла. Чаманыман, Д.Никитин, А.Кудряшов да И.Корчемкин воинский порысым шуктышыла вуйым пыштеныт.
Тыгак ончычсо педагог А.А.Смирноват – кызыт СВО кайыме верыште. Лицейыште кадет класс-влакым патриот шӱлышеш куштымаште тудо кугу надырым пыштен.
Тидым Сеҥымаш аллей манын лӱмденыт. Ондак школышто тунемме годым сарын ветеранже дене пырля шарнымаш пушеҥгым меат шынденна. Кызыт адакат салтак-влаклан элнам аралаш логалеш. Ынде нунын сеҥымашыштлан ӱшанена.