Йошкар-Олаште Полупроводник-влак прибор завод воктенысе изи садлан предприятийын ондакысе пашаеҥже, Кугу Отечественный сарын ветеранже, Совет Ушем Герой А.И.Владимировын лӱмжым пуымо.
Изи садым почмаште Марий Элым Вуйлатыше Ю.Зайцев лийын. Тудо ты инициативылан Ветеран-влак советым, профкомым, заводын администрацийжым да коллектившым тауштен.
Александр Иванович ЗПП-ште 37 ий пашам ыштен, «Знак Почёта» орден дене наградитлалтын. Йошкар армийлан 19 ияш служитлаш тӱҥалын да Сталинград гыч Германий марте шуын. Йошкар площадьыште Сеҥымаш парадыште ошкылын, 37-ше гвардейский стрелковый дивизийын тистыжым нумалын.
ЗПП-н гендиректоржо Пётр Козлов А.И.Владимиров нерген шарналтен да Герой лӱмеш изи садым почмаш заводын кугу событийже манын. Предприятийым вуйлатышын мутшо почеш, кызыт тидыже самырык специалист-влаклан Геройын примерже негызеш пашам ышташ кӱлешан.
А.И.Владимировын Юрий эргыже участник ден организатор-влакым тауштен, республикын шочмо кечыж дене саламлен.