14-15 ияш улмем годым, йолташ ӱдырем-влак дене погынен, Рошто деч ончыч йӱдым мужедынна: капка гоч портышкемым кышкенна, малаш вочмо деч ончыч ӱпым шерына да шергем кӱпчык йымак пыштеденна. Ковам ончыкылык пелашым ужаш полшышо эше ик мужедмаш нерген каласкален. Тидлан пычкемыш мончаш воштончышым шогалтыман, ончыкыжо сорта тулым шындаш да воктекыже шергашым пышташ кӱлын. Воштончыш ваштареш шичман да тӱткын ончыман – тушто ончыкылык пелаш койшаш. Но ме тыге мужедаш тоштын огынал, лӱдынна.
Кугурак лиймекат, мужедмым чарнен омыл. Икана студент годым тӱшкагудо пӧлемыште пырля илыме ӱдыр-влак дене ончыкылык нерген пален налаш шонен пыштенна. Сортам чӱктенна да тарелкаш вӱдым теменна. Левыше шыштым вӱдыш чыпчыктенна. Чӱчалтыш-влак кылмат да вӱд ӱмбалне шкешотан сӱретым «сӱретлат». Ик йолташ ӱдыремлан тыгай мужедмаш имньым, тувырым ончыктен. «Вашке марлан лектат да тӱшкагудо гыч кает», – мыскара йӧре ойлышна тунам тудлан. Ик ий гыч тыгак лие.
Елена.
Волжский район.
Интернет гыч налме фото.