Интернетыште илыш шолеш. Южгунам ты юзо тӱняш пуретат, ончен ӧрат, мо тушто ышталтеш, могай йӧн уло… Жапым эртараш я пайдале арверым ышташ – тыште чылажымат кычал муаш лиеш. Мемнан тачысе геройнат ты юзо тӱняште шке тамгажым коден. Шукерте огыл Оля Майкова (Мошкина) соцкыллан келшыше стикер-влакым ышташ тӱҥалын. Тиде пашам кузе вораҥдарымыж нерген палдарена.
– Стикер-влакым ямдылаш шонымаш кузе да кунам шочын?
– Ончыч тыгай стикер-влак дене пайдаланен омыл. Но интернетыште стикер-влак дене сӧрастарыме фото-шамычым ужмеке, чӱчкыдын куанен онченам.
Блогер-влакын лаштыкыштым шергалам. Мутлан, шукерте огыл Йошкар-Ола гыч шкенжым Онли Вегас семын возышо ик визажист сторисыштыже стикервлакым ямдылымыж нерген палдарен. Тудо программист огыл. Сандене мыят тидым ышташ нелыжак огыл манын шоналтенам да интернетыште кузе ыштымым кычалынам. Тыге телеграмыште курсым верештынам, тунемаш тӱҥалынам.
Программе почеш тӱрлӧ приложенийым телефоныш ешаренам. Пашам ыштен ончымеке, ударакшым кораҥденам, кӱлешаным коденам. Тыгак тиде темым келгынрак шымлаш стикер-влак дене пашам шуктышо-влакын лаштыкыштым онченам.
Стикер-влакым ятыр еҥ ышта, а молан марий стикерым ыштен ончаш огыл манын шоналтенам. Тыге марий сынан сӱрет-влакым эркын ямдылаш пижынам, телеграм-каналышкем вераҥденам.
Телеграм-каналым изиш пойдарымеке, йолташ ӱдыремлан ончыктенам, шонымашем дене палдаренам. Тудо пашамым аклен, терген ончен, ой-каҥаш дене полшен.
– Шкешотан сӱрет манам гын, йоҥылыш ом лий, очыни. Тудым ышташ неле мо? Тидлан мыняр жап кая?
– Неле манын ом керт. Мылам тӱрлӧ редактор (приложений) дене пашам ышташ келша, садлан жап улмо годым ты сомылым шуктем. Ик коллекцийым ик касыште ышташ лиеш. Кунам гын кечыште ик сӱрет веле шочеш. Тӱҥ шотышто ончылгоч иктаж пайремым ойырен налам да тиде кечылан иктаж индеш-лу стикерым шукташ тыршем.
– Кушто тыгай сӧраллыкым кучылташ лиеш?
– Соцкыл ден мессенджерлаштат лиеш, йолташ-влак ватсапыштат кучылтына манын возат. Стикер вет тамга семын ышталтын, тудын дене кечмогай сӱретым келыштараш лиеш.
– Мыняр стикер кызытеш уло?
– «Арнян кечыжевлак», «Поро эр», «Паша але каныш кече», «Пытартыш йыҥгыр», «Кеҥеж» коллекций улыт.
– Тый кызыт изи ньогам ончен куштет. А кунам творческий пашалан жапым муат?
– Самырык-влак смартфоным темдышташ жапым кечкунамат да кеч-куштат муыт, шонем. Южгунам ик кид дене коляскым шӱкем, весе дене телефоным темдыштам. Но шукыж годым ӱдыремын малымыж годым шинчылтам.
– Стикер-влакым лукмеке, могай реакций лийын?
– Икмыняр коллекцийым ямдылымеке, кузе палдараш мужедым. Но тудым айдалийже тӱҥалме шуын огыл. Пашалан кушшо тылзыште пижман, маныт калыкыште. Мый тиде шонымаш дене келшем, садлан посна кечым, адакшым шочмым, вученам. Жап толын шумеке, ялыш акам деке арнялан каенам. Туштак луктынам да, телефоным пӧртеш пыштен коден, пакчаш лектынам. Ик жап гыч телефонем ончальым, а тушто тынар шуко серыш. Телеграм-каналышкат шагалын огыл ушненыт. Мый ӧрынам. Вет ты проект деч мый нимом вучен омыл. Иккок еҥ кучылтеш гын, пеш сай лиеш, шоненам. Тыгай реакцийлан моткоч куаненам!
Йолташ ӱдырем «ВКонтакте» соцкылыште увертараш темлен. Тидын нерген шонен омыл ыле, но тушкат вераҥденам. Туштат икмыняр марий группо пост дене пайлалтын. Чылажат моткоч вучыдымын лийын. Тыге порын аклымылан кажнылан моткоч кугу тау!
– Йоча-влаклан келшыше коллекцийым ышташ шонымаш уке?
– Шонымаш шуко! Кумыл да жап веле лийышт. Марий тамга-влакымат кучылташ сай ыле. Ончыч тидым кузе илышыш шыҥдараш шоналташ, шымлаш, тунемаш кӱлеш.
– Оля, тый моткоч кӱлешан, жаплан келшыше пашам шуктет! Ончыкыжат пашат вораҥже! У саскам умбакыжат вучена.
Вероника МУСТАЕВА.
О.Майкован альбомжо гыч налме фото-влак.