Сочиште КВН-ыште модыныт

Шукерте огыл Россий ФСИН-ын Марий Элысе управленийжын икмыняр пашаеҥже Сочи ола гыч пӧртылын. Тушто Россий ФСИН-ын КВН кубокшо эртаралтын. Марий Эл гыч «Коллеги по неволе» команде «Лучший дебют» номинацийыште ойыртемалтын.

Ведомственный кубок деч посна ты команде эше «КиВиН-2023» тӱнямбал фестивальыште мастарлыкшым ончыктен. Шӱдӧ наре команде кокла гыч «Коллеги по неволе» кокымшо этапыш логалын огыл гынат, икымше гана тыгай фестивальыш лекше команде моткоч сай номерым ямдылен манын палемденыт организатор-влак.

«Коллеги по неволе» командыш республикысе УФСИН-ын тӱрлӧ подразделенийже гыч кандаш пашаеҥ чумырген. Нунын кокла гыч иктыже – Медведево посёлкысо 3-шо номеран исправительный колонийыште пашам ыштыше М.В.Черных.

Мария Владиславовна Йошкар-Олаште шочын-кушкын. Ача-аваже УФСИН-ыште пашам ыштеныт, садлан ончыкылык профессий шотышто ӱдырын йодышыжо лектын огыл – ача-аваж семын служитлаш шонен. МарГУ-што, вара Волгатехыште тунемын, магистратурышто шинчымашыжым нӧлтен. Да 2011 ийыште Медведево посёлкысо 3-шо номеран исправительный колонийыш службыш толын. Кызыт Мария Владиславовна – элгӧргӧ службын капитанже, кадр-влак пӧлкан да личный состав дене паша шотышто кугурак инспектор.

У еҥ-влакым пашаш налына да службо гыч колтена, кӱлеш документым ямдылена веле огыл, тыгак пашаеҥ-влак дене воспитательный да социальный сомылым виктарена, тӱрлӧ йодышым рашемдена, мероприятийлаш ушнена, – манеш М.В.Черных.

Мария Владиславовна – чолга, шкенжым тӱрлӧ аланыште тергыше еҥ. Тудо шкенжым эре шуараш тырша, шке службыж дене кылдалтше веле огыл, моло мероприятийышкат кумылын ушна. 2017 ийыште, мутлан, республикысе «Мисс УИС» конкурсышто «Вице-мисс» лӱм дене палемдалтын. Тыгак почеламут-влакым возкала. Шукерте огыл тудо А.С.Серафимович лӱмеш сылнымут премийым налаш конкурсыш ушнаш йодмашым колтен.

Сочи олаш кайыме деч ончыч тиде команде денак «Кубок рабочей молодёжи» республикысе конкурсышто лийме, мемнам тудын организаторжо Олег Ремизов ӱжын ыле. Конкурс эртаралте, ме лыпланышна. Икмыняр жап гыч Моско гыч ӱжмаш тольо – Россий ФСИН-ын КВН кубокыштыжо участвоватлаш темлат. Ме тиде кандаш еҥан команде денак ямдылалташ тӱҥална. Тидланже тылзе наре жап гына кодын ыле. Кастене, каныш кечылаште, У ий каныш годым репетицийыш коштынна. Сценарийым возаш Йошкар-Ола гыч КВН-щик Роман Лаптев полшен. А ме вара тудым шкалан келшышын келыштаренна, – каласкала М.Черных.

Ончыч «КиВиН-2023» тӱнямбал фестивальыште участвоватленыт. Тушко Россий гыч веле огыл, Казахстан, Белоруссий гыч 500 наре команде ушнен. «Коллеги по неволе» икымше кечынак шке номержым ончыктен.

– Кок конкурслан посна сценарийым ямдылыме, номер-влак тӱрлӧ лийыныт. Тӱнямбал конкурсышто Марий Эл дене кылдалтше выступленийым ямдыленна. Конкурслан марий орнаментан толстовкым ургыктенна, сценыш марий сем почеш куштен лектынна. Тиде ончышо-влаклан да жюрилан моткоч келшен, мемнан республикна нерген пален налаш оҥай лийын манын каласеныт. А Россий ФСИН-ын КВН кубокшо верч таҥасымаш годым выступленийна утларакшым службо дене кылдалтше лийын. Тылеч ончыч командынан капитанже Павел Цветков гына тыгай сынан конкурсышто таҥасен ыле, а ме – икымше гана. Моло команде-влак кузе ямдылалтыт, выступатлат – эскеренна, онченна. 14 команде коклаште ме гына дебютант лийын огынал, садлан тыгай-влак коклаште ойыртемалтмыланна куаненна. Ончыкыжымат тыгай конкурсыш ушнаш кумыл уло, – манеш Мария Владиславовна.

«Коллеги по неволе» командын участникше-влак Сочи гыч нӧлталтше кумылан, йӱлышӧ шинчан пӧртылыныт. Лу кече жапыште кок конкурсышто мастарлыкым ончыктеныт, ола мучко экскурсий дене кок гана коштыныт, курыкыш кӱзеныт, аттракционлаште лийыныт. Нуным дебютышт дене саламлена!

М.Черныхын альбомжо гыч налме фото-влак.