Сочи олаште Сириус кумдыкышто Шочмо Элым аралыше-влакын кубокышт верч ӱстембал теннис, волейбол дене шинчен модмаш, пулевой да пикш дене лӱйкалымаш, пауэрлифтинг, армрестлинг дене Российысе таҥасымаш икымше гана эртаралтын. Тушко элнан 62 регионжо гыч специальный военный операцийыште участвоватлыше 200 наре еҥ ушнен. Марий Элын чапшым «Сильные духом» паралимпийский сборный команде арален.
Таҥасымаш кум кече каен. Участник-влак коклаште нелын сусыргышо, эмганыше-шамыч шагалынжак огыл лийыныт. Туге гынат нуно, уло вийым, погалтен, ты мероприятийыш толыныт. Марий Эл гыч СВО-н ветеранже Алексей Суворовын специальный военный операцийыште лиймыж годым кидше нелын сусырген. Изиш гына тудын деч посна кодын огыл. Но салтак тидлан ӧпкем кучен илаш огыл, а спортлан утларак тӱткышым ойыраш тӱҥалын. Шке жапыштыже Алексей Николаевич Марий Турек ола шотан илемым вуйлатен. Но ончычсо пограничник семын элнан осал ваштареш кучедалмыжым шып ончен шинчен кертын огыл. Тыге СВО-ш шке кумылын каен. Нелын сусыргымыж деч вара мӧҥгыжӧ пӧртылын.
«Сильные духом» сборный командын участникше Алексей Суворов ты таҥасымашын ӱстембал теннис дисциплиныштыже кумшо вер дене палемдалтын, а вес участник Дмитрий Глушков пулевой лӱйкалымаш дене лу эн тале-влак радамыш логалын.
– Ты таҥасымашыште шкенам сайынак ончыкташ тыршенна. Ончыкыжымат тидын шотышто кугу пашам шуктыман: СВО-н участникше, ветеранже-шамычым паралимпийский спортлан кумылаҥдыман. Вес таҥасымашлан эшеат сайынрак ямдылалташ тӱҥалына. Кугу кӱкшытыш шуаш манын, шукырак да сайынрак заниматлаш тӱҥалына, – палемден таҥасымашын той призёржо.
Шочмо Элым аралыше-влакын кубокшо верч таҥасымашым СВО-н участникше, ветеранже-шамычлан лӱмынак келыштарыме. Тудын тӱҥ шонымашыже сӧйыштӧ лийше, эмганыше салтак-влаклан реабилитацийым эрташ полшаш да паралимпийский спортлан кумылаҥдаш.
Российысе Паралимпийский комитетын президентше П.Рожков палемден, ты мероприятий паралимпийский таҥасымаш-влак тӱшкаш пурышо ик эн кугу таҥасымаш семын эрташ тӱҥалеш. Илен-толын, ветеран-влаклан телымсе спорт таҥасымашымат илышыш шыҥдарыман. Тидын шотышто кызыт кугу паша шукталтеш.