Снегын емыж ден лышташыже органический кислоталан да дубильный веществалан поян улыт. Нуно верге да мокш гыч кӱм луктыт, пагар йора годым полшат.
Аллергий дене орланеда гын, ик кугу совла тыгыдемдыме лышташ ӱмбак ик стакан шокшо вӱдым темыман да ик шагат шинчыктыман. Лемым пел стакан дене кочмо деч ончыч йӱман.
Гастрит годым ик кугу совла лышташ ӱмбаке 2 стакан йӱкшышӧ шолтымо вӱдым темыман. Иктаж куд шагат шинчыктыман. Вара шӱрыман да пел стакан дене кечеш кум гана йӱман.
Менструаций чот кайыме годым ик кугу совла лышташ ӱмбак кок стакан йӱкшыктарыме шолтымо вӱдым темыман. Куд шагат наре шинчыктыман да шӱрыман. Лемым пел стакан дене кажне кечын йӱман.
Ангине годым 50 г тыгыдемдыме снеге да эҥыж лышташ ӱмбак ик литр вӱдым темыман. Тудым йӱдвошт шинчыктыман. Эрдене шолаш пуртыман да изи тул ӱмбалне, петыртыш дене петырен, 15 минут шолтыман. Вара шокшын леведман да эше 15 минут шинчыктыман. Шӱрыман да леве лем дене логарым шӱалтыман. Тыге кажне кок шагат гыч ыштыман.
Геморрой дене орланыме годым ик кугу совла снеге лышташ ӱмбак ик стакан шокшо вӱдым темыман да 20 минут шинчыктыман. Вара шӱрыман да клизмым ыштыман.