Национальный СМИ пашаеҥ-влакын IX форумышт Казаньыште кокымшо кече эрта.
Теҥгече участник-влак Свияжск отро-олашке экскурсийыш миеныт, таче — Иннополис у олаште.
Пленарный заседанийыште утларакшым кумда элыштына шочмо йылме дене савыкталтше газет, журнал, телерадио редакций пашаеҥ-влакын тачысе илышыштым саемдаш, мом ышташ кӱлмым каҥашыме. Шочмо йылмым тунемаш, йӱлам, тӱвырам арален кодаш гына огыл, вияҥдаш Татарстан Республикыште шуко ышталтеш. Тидлан федерал программе деч посна республикын шкенжынат посна программыже уло, кудыжо ий гыч ийыш 100 процент дене шукталтеш, маньыч. Казань вес регионышто илыше татар-влакланат шуко полша, СМИ пашалан оксам ойыра.
— Тачысе кечын шке калык верч шонымо деч посна эше икте-весе коклаште келшымаш шотышто тургыжланышаш улына. Шочмо йылме дене возыза, лудса, кутырыза. Ме Российыште илена, сандене руш йылмымат сайын палаш кӱлеш, — манеш Татарстан Кугыжаныш Советын председательже Фарид Мухаметшин.