16-18 сентябрьыште Санкт-Петербургышто Российысе активист-влакын толкыныштын «Пост №1» слётышт эртаралтын.
Слётыш 40 утла регион гыч 600 утла кадет, юнармеец, Почетный караулын да Шарнымаш Вахтын сменышт гыч 89 команде погыненыт.
Йошкар-Ола гыч Т.И.Александрова лӱмеш 11-ше №-ан лицейыште 11-ше классыште тунемше кадет-влак миен коштыныт.
Участник-влак строевой конкурсышто, спортын военно-прикладной видше дене таҥасеныт, элын историйжым да Кугу Отечественный сарын тӱҥ событийлажым палымыштым ончыктеныт, «Маршрутами Победы по моему родному краю» усталык конкурсышто шкеныштым тергеныт.
Йошкар-Ола гыч кадет-влак конкурс-влакым сайын эртеныт да 5-ше верыш лектыныт.