1-4 октябрьыште Киров областьыште селалаште илыше самырык еҥ-влаклан Юл кундемысе федеральный округын слётшо эртен. Тушко 14 кундем гыч 100 наре участник ушнен. Мероприятий тӱҥ шотышто селала ден яллам самырык еҥ-влакын полшымышт дене вияҥдыме сомыллан пӧлеклалтын.
Слётыш Марий Элын чолга ӱдыр-рвезыже-влакат ушненыт. Нуно тӱрлӧ туныктымо площадкыште шке моштымашыштым тергеныт. Тыгак пошкудо регион гыч толшо ӱдыр-рвезе-влакын пашашт дене палыме лийыныт, нунын опытыштлан эҥертен, шке кундемыште тӱрлӧ шонымаш-влакым илышыш пурташ кӱлмӧ нерген ойленыт. Слётын участникше-влак, ялла ден селалаште илыше самырык еҥ-влаклан кугыжаныш могырым иктаж-могай полышым пуат гын, сайрак лиеш ыле маныт.