13-15 майыште Йошкар-Олаште «Марий Элын самырык талантше-влак» конкурс эртаралтын. Тушко 7 ияш гыч 30 ияш марте музыкант, хореограф, сӱретче-влак мастарлыкыштым ончыктеныт.
И.С.Палантай лӱмеш тӱвыра да сымыктыш колледжыште оркестрово-струнный пӧлкаште 4-ше курсышто тунемше Мария Орзаева тыгай конкурсышко икымше гана ушнен да 3-шо вер дене палемдалтын.
Икымше гана
Талантан ӱдыр-рвезе-влакым кычалаш манын, 1993 ий годсек кундемыштына «Марий Элын самырык талантше-влак» конкурс кум ийлан ик гана эртаралтеш. Жюри Марий Элын тӱрлӧ районжо, олаж гыч толшо эн виян участник-влакым ойыра. Мария тыгай конкурс улмо нерген шукертсек пален, сандене тений «Музыкальное исполнительское искусство» номинацийыште шкенжым терген.
– Концертмейстер Екатерина Андреевна Андрианова дене пырля Сен-Сансын «Хаванез», Златев-Черкинын «Севдана» произведенийлаштым шоктенна. Ты конкурсышко ушнаш оҥайын чучо. Вет тыште музыкант-влакым веле огыл, куштызо, сӱретче-влакымат аклат. Кумшо верыш лекмемлан моткоч куаненам. Сеҥыше-влак дене пырля гала-концертыште выступатленам, – ойла Мария Орзаева.
Скрипкым 7 ияш кучен
Мария Йошкар-Олаште шочын-кушкын. Скрипке дене ынде 13 ий шокта. Лывырге кидыштыже семӱзгар модеш гына, а семже – кӧргӧ куатан, ювиян, илыш вийым пуышо, чоныш логалше. Йошкар-Оласе президент сымыктыш школышто скрипке дене икымше гана шокташ тӱҥалын да ты семӱзгарым йӧратен шынден.
– Усталык шӱлыш мыланем ачам ден авам деч куснен. Ачам гитар дене сайын шокта, авам сылнын мура. Но нуно илыш корныштым йӧратыме пашашт дене кылден огытыл. 11-ше классыште тунемше шольым гитарым перкала.
Шым ияш улмем годым авам калыкле президент сымыктыш школышко (кызыт тудо – И.С.Палантай лӱмеш тӱвыра да сымыктыш колледжын калыкле сымыктыш гимназийже) тунемаш колтен. Экзаменыште йӱкым пален моштымашым (слухым), ритмым, мурен моштымем тергеныт. Музыкальный мастарлыкем лийын, сандене тушко куштылгын пурен кертынам. 1-ше гыч 9-ше классла марте скрипке классыште тунемынам.
Скрипке – ик неле семӱзгар, туддене шокташ тунемаш йӧсӧ. Варажым куштылгын чучеш. 7-ше классыште Игорь Василенко дене дуэт шочо. Ме коктын тӱрлӧ конкурсышто шкеннам тергенна, сеҥымашке шуынна. Поснак В.Яшмолкин лӱмеш «Струнно-смычковые инструменты» конкурсышто ойыртемалтынна, – мане Мария.
Колледжыш тунемаш пурен
Скрипке дене шке мастарлыкым нӧлтышӧ ӱдыр умбакыжат ты корно дене каяш шонен. 2018 ийыште 9-ше класс деч вара И.С.Палантай лӱмеш тӱвыра да сымыктыш колледжышке «Оркестрово-струнный» пӧлкашке тунемаш пурен. Ныл ийыште Мария скрипке дене келге шинчымашым налын, концертлаште, форумлаште, галлерейлаште, театрлаште моло ӱдыр-рвезе-влак дене пырля шоктен.
А 2019 ийыште колледж пелен ты семӱзгар дене шоктымо «Эксклюзив» ансамбль чумыралтын. Маша – коллективын ик чолга еҥже.
– Мемнан пӧлкашке шукын тунемаш огыт тол. Группыштына улыжат 6 еҥ гына. Нуно Волжский, Морко районла, Йошкар-Ола гыч улыт. Мыланем тыште тунемаш келша. Тышке толмемлан ом ӧкынӧ.
А «Эксклюзив» ансамбльышке шкенан пӧлкасе тӱрлӧ курс гыч ӱдыр-рвезе-влак коштыт, чылаже иктаж 30-40 еҥ погынена. Коллектив у, сандене кызытеш кугу сеҥымашна уке, – мане М.Орзаева.
Мария колледжым йошкар диплом дене пытараш шона. А яра жапшым англичан йылмым тунемаш ойыра.
М.Орзаева илыш корныжым тӱвыра паша дене кылдынеже. Озаҥышке тунемаш каяш ямдылалтеш. Сандене Мариялан у сеҥымашым, тыршымашым, лектышым тыланена. Тек скрипке семже калык чоным эре куандара.