Тыгай лӱман регион-влак кокласе марий калык усталык фестиваль 24 сентябрьыште Виче кундемысе Вятские Поляны олаште лиеш.
Мероприятий «Победа» тӱвыра пӧртыштӧ эртаралтеш. Тушто кумылан-влакым «Шыже кочкыш» дегустаций, «Ковайын аптекыже», «Чодыран пӧлекше», «Бахча-сарай», «Кочайын амбарже», «Мастар кид», «Калык кочкыш», «Марий модмаш алан» манме вер-влак вучат. Марий аралтышым ышташ туныктышо мастер-класс лиеш. Тыгак «Айста пырля мурена да куштена!» концертыште этнографий ден фольклор коллектив, мурызо-влак мастарлыкыштым ончыктат.