Шӱргыял школыштына илыш шолынак шога. Кугурак вожатыйна Елена Валериановна пеш шуко мероприятийым эртара.
Кажне ийын шыжым тӱҥалтыш класслаште тунемше шольо-шӱжарна-шамычлан Шыже пайрем, а «Рвезе тукым» йоча ушемна дене Шыже бал эртаралтыт. А тиде ийын поснак оҥай ыле. Вожатыйна пакчасаска дене кылдалтше оҥай тушто-влакым туштен. Сеҥыше-влаклан пеш тамле пӧлекым пуэден. Тӱҥалтыш класслаште 21 йоча тунемеш. Елена Валериановна ик тунемшымат пӧлек деч посна коден огыл. Чыланат пеш куаненыт. Нунылан дискотекымат эртарен. Пеш сылне муро-влакым тӱрлӧ мультфильм гыч налын.
А Шыже бал отряд-влак коклаште лийын. Конкурс-шамычат оҥай улыт ыле. Шыже костюмым ӱдыр-влак рвезе-шамычлан ыштеныт. Дискотекыште чолга лиймынамат вожатыйна аклен. Чыла таҥасымашла гоч эртымеке, «Пеледыш» отряд 1-ше вер дене палемдалтын. 2-шо верым «Ал парус» отряд налын. «Неугомон» ден «Кечыйол» отряд-влак 3-шо верым пайленыт.
Шыже пагытлан пӧлеклалтше пайрем-влак чоныштына пеш сай кышам коденыт.
Дмитрий Егоров, «Рвезе тукым» йоча ушемын дружине председательже.
Снимкыште: Шыже пайрем годым.