25 январь – Студент-влакын да Тачана-шамычын кечышт. Кужэҥер район Шорсола ял ӱдыр Т.Дмитриеван нине кок пайремым палемдаш кок амалже уло. Татьяна – МарГУ-со Калык культур да тӱвыра кокласе кыл институтын нылымше курсын студенткыже. Марий ӱдыр вузын илышыштыже шкенжым чолган ончыкта: шанче конференцийлаште участвоватла, статья-влакым воза.
Шочмо йылмым йӧрата
Таня 9-ше класс марте Шорсола школышто тунемын, вара Советский район Ӱшнӱр кыдалаш школыш куснен.
– 5-ше классыште марий йылме ден литературым туныктышо Алевтина Максимовна Барабанщикова шочмо йылмылан да сылнымутлан шӱмаҥден. Тӱрлӧ сылнымут лудмашке мыйым ямдылен. Тушто шкемым ончыктен, моло йоча-влакын шочмо йылмыштым йӧратымыштым ужын, марий улмем дене эшеат чот кугешнаш таратен. Кугурак класслаште, калыкем дене кылдалтше докладым возен, шанче конференцийлаш ушненам. Ты паша чонемлан куаным конден.
Эшежым мӧҥгыштӧ туныктышыла модаш йӧратенам. Курчак-шамычемым марла «туныктем», отметкым шындылам ыле. Йоча годсек туныктышо пашам йӧратенам. Сандене 11 классым чыла «визытанлан» пытарымеке, МарГУ-со Калык культур да тӱвыра кокласе кыл институтыш марий йылме ден литературым да англичан йылмым туныктышылан тунемаш пуренам. Тыгодым тӱҥалтыш класслам туныктышо специальностьым налынам. Ӱмаште телым тидын шотышто кугыжаныш экзаменым кученам, – ойла Т.Дмитриева.
Студент пагыт – весела жап
Самырык годым шке мастарлыкым, вийым тергаш да ончыкташ чыла йӧн уло.
– Университетысе илыш моткоч оҥай. Мый уло кумылын тунемаш коштам. Мужырышто чӱчкыдын сылнымут, педагогике дене кылдалтше иктаж-могай книгам лудаш пуат. Тудым шымлымеке, мый шке шонымашан шанче статьям возем да эн сайже дене конференцийлаште участвоватлем. Пашамым кажне гана кӱкшын аклат. Тидлан да сайын тунеммемлан кӧра ӱмаште мыйым ректорын балышкыже ӱжыныт, – палдарыш чолга студентке.
Марий шӱлышан ӱдыр шкенжым тӱрлӧ шӧрыныштӧ шуара. 2024 ийыште Марий радио ГТРК-ште «Эркече» передачым вӱден.
– Радиошто пашам ныл тылзе ыштенам. Мый ешартыш образованийым налынам. Сандене иканаште пашамат ышташ, тунемашат неле лийын. Но радиошто тыршымем, шкемым еҥ ончылно чын кучаш, журналист пашам умылаш, тӱҥжӧ – марла арун мутланаш туныктен, – каласыш Татьяна.
Шочмо кече гай
Студентке кызыт эн оҥай, эн весела илышым ила. Но нелылык деч посна йокрок манеш. Татьяна каласкала:
– Тӱрлыжат лиеда. Кунам гын весела, кунам гын йӧсӧ. Чыла икшырымын кая гын, илышын тамже йомеш. Пашам ышташ, тунемаш, шкем виянракым ышташ азарт манме кӱлеш. Нелылыкым сеҥымеке, куанжат шукырак.
Студент кечым палемдымаш укеат, манаш лиеш. Сессийлан ямдылалтам. А теве Тачана-влакын кечыштым йӧратем.
Татьяна лӱмым мылам авам пуэн. Ачам ден изам Инна манын лӱмдынешт ыле. Но авай нуным колыштын огыл да каласен: «Тиде изи падыраш могай Инна?! Ялт Татьяна Михайловна вет!» Мылам шке лӱмем моткоч келша, сылнын да виян йоҥга. Ешыште, лишыл еҥем-влак мыйым Танюш маныт, школышто Татьяна улам ыле. Кызытат шукышт Татьяна ойлат, вес семын огыл. Лӱм сӧрал, эшежым посна пайрем уло. Могай сай. Мыйым Тачанан кечышт дене изинек саламлат, ача-авам эре пӧлекым кучыктат. Ты кечын чыла саламлыме шомак – мыйын, чылт шочмо кечем. Тений Тачана-влакын кечыштым палемдаш тӱҥалам але укем, эше раш ойлен ом керт. Шукыж годым марий театрыш канаш коштам, марий постановко-влакым чот йӧратем. Нуным ончен, ум пален налам, чонем дене канем. Йолташем-влак дене рӱдӧ паркыште але иктаж-могай кафеште канена. Йӧратем тӱрлӧ теме дене кылдалтше квизыш ушнаш. Но утларакшым каныш кечылаште, а тений Тачана-влакын кечышт лач рушарнян лиеш, ялыш коштам. «Автобус вашка шочмо ялыш» муро вигак ушышкем толеш. Тушто паша эре уло, но шочмо шепкаште эре сай, ласка. Мончаш пурен, капкыл лывырга, ача-ава дене пырля ӱстембал коклаште шинчен, иктым-весым мутланен чон кана.
Теве могай марий Татьяна: шыма, ушан, ача-авам пагалыше да йӧратыше, шочмо калыкшым, йылмыжым аклыше.
Студенткын еш альбомжо гыч налме фото-влак.