Йошкар-Олалан 440 ий темме лӱмеш «Сберкотята» проект почеш рӱдоланам шым той пырыс сӧрастараш тӱҥалын.
Тудым Сбербанк, Марий Элысе креативный индустрий школ да Йошкар-Оласе историй тоштер ола администраций дене пырля илышыш шыҥдареныт. Нине пырыс-влакым еҥ-шамыч «Йошкин пырысын ешыже» да моло семынат ойлат.
Фигурко-влак кугу огытыл, 20 сантиметрыш шуыт. Нуным Владимир олаште той гыч веленыт да рӱдоласе калык коштмо верлашке келыштареныт. Чыла шым фигуркым ик шагат жапыште ончен савырнаш лиеш.
Кажне пырыслан лӱмымат пуымо. Теве Йошкар-Оласе кӱртньыгорно вокзал воктене Дымка изи чемоданым кучен шогылтеш да тораш кайыше ден пӧртылшӧ-влак дене саламлалтеш да чеверласа. Благовещенский башне дене Мурзик гитарым шокта. Набережныйыште улшо Барсик пырысын ведраштыже кугу кол коеш. А Йошкар-Оласе историй тоштер воктене изи рюкзакан Василий фотоаппарат дене историйнам фотографироватлаш ямде. Э.Сапаев лӱмеш опер да балет театр воктенысе пуантым чийыше Бусинка пырыс «кушта», рӱдоласе каныме паркыш пурымаште весела Ирискан мороженыйлан куанымыже шижалтеш. Сбербанк воктене вераҥдыме ыршиян Карл пырыслан 10 теҥгем кучыктеныт, галстукым пижыктеныт.
Тыгай шонымаш дене Российысе моло оламат шуко фигурко дене сӧрастареныт. Мутлан, Крымыште мӱкш-влакым ужаш лиеш, Серпуховышто – павлин-шамычым, Рязаньыште – поҥгым. А Йошкар-Олаште ынде пырыс-влак «илат». Мый 11 тыгай пырысым палем. А те?
Эльвира Терентьева.
Авторын фотожо-влак.