Мо шарнем, ковам эре оксам поген. Шапашым книга лаштык-влак коклаш ончыч опта ыле, варажым, окса конверт кӱжгеммеке, вургем шкафыш шылташ тӱҥалын. Шолышташ пурат гын, вашке муын кертыт манын шонен, икмыняр жап гыч йӧнан вес верым кычалаш тӱҥалын. «Тиде окса дене колымекем мыйым поген пыштеда», – манеш ыле тудо.
Ковам телым колен, малаш возын да помыжалтын огыл. Коронавирус шарлен ыле, садлан туддене чеверласыме сомылым вашке-вашке шукташ логале. Тоен толмеке гына, ӱстелтӧрыштӧ поминаен шинчыме годым, ковамын погымо оксаж нерген родо кокла гыч ала-кӧ мутым лукто. Шылташ лийме верлаште кычал ончышна, но нигуштат ыжна верешт.
Тылеч вара иктаж кок тылзе гыч омым ужам. Ковам пуйто кухньыштыжо шога, когыльым кӱэштеш. А пушыжо могай тутло! Сийым ямдылыме гутлаште тудо ала-мом шке семынже ойла. Тидым ыштыме гутлаште сад кӧршӧкым ӱстел покшелан кенета конден шында. Мый тыге ыштымыжлан ӧрынам, а ковам кидше дене атыш ончыкта да шыргыжеш. Пеледыш ӱмбала шындыме кок атыште кушкын.
Помыжалтмекем, ковамын тамле когыльыжым шарналтен киенам, а вара вуйыштем йодыш пӧрдаш тӱҥалын: пеледышыже омыштем молан кончен?
Тыге лийме деч вара иктаж арня гыч ковамын пӧртышкыжӧ кудальым. Пурен шогальымат, шинчамлан омышто ужмо пеледыш ате перныш. Ала-могай вий мыйым туддек пуйто шке намийыш, ик атым весе гыч луктым да пундаштыже скотч ден вӱдылмӧ целлофан пакетым ужым. Тушто окса киен. Шке семынем ковамлан тауштышым.
Елена.
Волжск.
Фотом https://www.freepik.com/ сайт гыч налме.