Кызыт Марий Элысе пасулаште шурным талын погат. Тений кундемыштына 152 тӱжем гектар кумдыкышто пырчан да отызан культурым жапыштыже шийын аралаш пыштыман. Чапле шурно Советский, У Торъял, Параньга да моло районласе пасулаште шочын. Теве Медведево район «Семёновский» племзаводын Эсенейсола ял воктенысе шыдаҥ пасуштыжо Анатолий Иванович Лаврентьев «Ростсельмаш» да Николай Николаевич Шерняков «Клаас» комбайн дене валокыш тӱред пыштыме шыдаҥым шийыт.
Паша чынже денак шолеш. Мутлан, А.И.Лаврентьев эр гыч кечывал марте вич бункер пырчым А.А.Кошкинын вӱдымӧ «Хово» машинашкыже (15 тонным наҥгаен кертеш) ястарен. Жапым аныклаш манын, пасу пашаеҥ-влаклан кечывал кочкышымат паша верышке лӱмынак келыштарыме УАЗ-452 машина дене шупшыктат. Тиде кӱлешан сомылым водитель А.А.Зиновьев ден кочмывер пашаеҥ И.А.Анисимова сайын шуктат.
Иван Речкин.
Авторын фотожо-влак.