Республикысе ялозанлык-влак 340 тӱжем тонн шурным поген налшаш улыт – тидыже ӱмашсе деч 1,6 гана шукырак.
Марий Элысе ялозанлык да продовольствий министрын пашажым шуктышо А.Кондратенкон мутшо почеш, тений 152 тӱжем гектарыште шурно ден отызан культурым поген налшаш улына, тидыже кодшо ий дене таҥастарымаште 5 тӱжем гектарлан шукырак. Технический культурым – 15 тӱжем гектарыште да 4 тӱжем гектарлан ятыррак, пареҥгым – 2,8 гектарыште да пакчасаскам – 1,7 гектарыште.
27 сентябрьлан озанлыклаште 139 тӱжем гектар шурным да отызан культурым шийме, тидыже планыш 93 процентше лиеш. Бункерысе нелыт дене 389 тӱжем тонным поген налме, кокла лектыш – гектар гыч 28 центнер (ӱмаште – 26).
Тидыже ӱяҥдышым кӱлеш семын шавымылан, сай репродукциян нӧшмым ӱдымылан да кызытсе жаплан келшыше технике дене пайдаланымылан кӧра лийын.
128 тӱжем тонн кормам ямдылыме, кажне вуй вольыклан (сӧсна ден кайыквусо деч посна) 25 центнер дене логалеш (план – 24).
Кокияш культурым 45 тӱжем гектарыште ӱдымӧ, планын 95 процентышкыже шуэш.
Тений машинно-тракторный парклашке озанлык-шамыч 1,5 млрд теҥгеаш 393 техникым да оборудованийым налыныт. Ялозанлык производствылан 528 млн теҥге кугыжаныш полыш пуалтын, тиде идалыкысе лимитын 80 процентше.