Израильысе археолог-влак Иерусалимыште Храмовый курыкысо Касвел пырдыж воктене (тудым эше «Стена Плача» маныт) кӱнчымӧ пашам шуктеныт.
Нуно йӱлалтыме шун гыч ыштыме 13 х 14 миллиметран печатьым верештыныт. Тушто мемнан эра деч VII-VI курым манын возалтын. Археолог-влак тидым Первый Храм але Соломонын Храм жапысе арвер маныт. Тушто кидым кучышо кок фигурым ончыктымо да акретле еврей йылме дене возымо: «Олан вуйлатышыжын». Библийыште ола вуйлатыше титул улмо нерген ойлалтеш. А официальный кӱнчымаш годым печатьым икымше гана мумо.