2 мартыште тунемше-влаклан Российысе калык-влакын шочмо йылмышт да литературышт дене олимпиадын пытартыш йыжыҥже МарГУ-што лийын.
Науко, образований да тӱвыра шотышто Федераций Совет да Йӱдвел-Эрвел федеральный университетын темлымыж почеш Марий Элыште кокымшо ий тыгай олимпиаде эртаралтеш. Республик гыч тений тушто 116 тунемше шке шинчымашыжым терген.
Ӱмашсе дене таҥастарымаште тений марий йылме да литератур дене олимпиадыш ныл пачаш шукырак ушненыт. Федеральный олимпиадыште сеҥышыш лекше, призёр-влаклан педагогике специальность дене вузлашке тунемаш пураш куштылгырак лиеш.
Олимпиадын пытартыш йыжыҥже тыгак Татарстаныште, Башкортостаныште да Удмуртийыште эртен.
Советский район Кельмаксола кыдалаш школ гыч марий йылмым да литературым туныктышо Ирина Валериановна Караваева 8-11-ше класслаште тунемше 14 икшывым олимпиадыш конден.
– Ӱмаште тыгай олимпиадыш ныл тунемше ушнен гын, тений – шукырак. Кельмаксола школышто марий йылме ден литературым 29 ий туныктем. Школышто таче 113 йоча шинчымашым налеш.
Ондакысе йоча-влак вес тӱрлӧ лийыныт. Кызыт информацийым изиш шукырак пуымо дене книгамат шагал лудыт. Шуко жап телефон дене шинчылташ йӧратат. Тыгак изирак класслаште икшыве-влак рушла кутырат. Ача-ава марий улыт гынат, шочшыштым рушла туныктат. Тидыже изиш шӱлыкаҥда.
Параньга район Матародо школ гыч 11-ше классыште тунемше Людмила Калинина тений марий литератур дене республикыште 3-шо верым, регион-влак кокласе кӱкшытыштӧ 1-ше верым налын. Тиде олимпиадыштат шкенжым терген.
– Матародо школ гыч ме икмыняр тунемше толынна. Мый икымше гана тыгай олимпиадыш ушненам. Марий йылме да литератур дене чылаже 10 заданийым ышташ пуалтын, тыгак сочиненийым возаш кӱлын. Заданий-влак чот неле лийын огытыл, – каласыш Л. Калинина.