У Торъял район Какшанмучаш селаште илыше Домрачевмыт ешыште ныл икшыве кушкеш. Шуко шочшан ава Ольга Александровна чон шокшыжым кажныжлан ситара да эн пиалан улам манын ойла.
О.Домрачева Какшанмучаш кыдалаш школышто 12 ий наре пашам ышта. Кызыт тудо директорын воспитатлыме паша шотышто алмаштышыже, информатикым, биологийым да химийым туныктышо.
– Шукерте огыл 9-ше классем луктынам. Шке пашам йӧратен ыштем. Школышто ӱдыр-рвезе-влаклан тӱрлӧ мероприятийым эртарена. Южгунамже шке икшывыланат жапым шагал ойырем манын шонем. Сандене кажне каныш кечылаште колоем-влак пелен лияш тыршем, – ойла Ольга Александровна.
Йоча жап – пиалан пагыт
Ольга Алексей пелашыж дене 12 ий ончыч ешым погеныт. Изинек вашла паленыт. Ик школышто тунемыныт. Пиалан ешыште кугурак Полина ӱдырышт 5-ше классым тунем пытарен, Егор эргышт – 3-шо классым, Миша 2-шо классыш вончен, а кум ияш Даниил йочасадыш коштеш. Йоча-влак тыршен тунемыт. Шкеныштым тунеммаштат, спортыштат, музыкыштат шуарат. Ольга ойла:
– Коклаштышт умылыдымаш, конешне, лиеш, сыренат колтат, но вашке сӧрасат. Эрге-влак акаштын мутыштым колыштыт. Пырля модыт. Тунеммаште сеҥымашышт нерген вашла палдарат. Полина, Егор ден Миша тылеч посна Какшанмучаш селасе музыкальный школыш вокал классыш коштыт. Тӱрлӧ семӱзгарым шымлат, фортепианым шокташ тунемыт. Музыкым йӧратымаш ковашт, мыйын авам Раисия Ивановна деч, очыни, куснен. Авам мураш уста, кызытат селасе тӱвыра пӧртыш ик ансамбльыш коштеш. Марий да руш калык муро-влакым сайын пала.
Йоча годым чыла вере шумо шуэш. Домрачевмыт ешыште кажныже кап кылыштым вияҥдат. Талын куржталыт, физкультур урокыш кумылын коштыт. Егор, мутлан, ече спортым йӧрата. Тӱрлӧ таҥасымаште вийжым ончыкта, призовой верым налеш. Икымше але лийын огыл гынат, тудын чыла ончылно.
Сай ача
Ольга Александровнан пелашыже мӧҥгыштыжӧ шагал лиеш. Кугу ешым пукшыман. Шукырак оксам налаш манын, Алексей вахте йӧн дене пашам ышташ Москош кудалыштеш.
– Ончыч Йӱдвелыште тыршен. Кызыт Москошто монолит пӧрт-влакым чоҥымаште пашам ышта. Йоча-шамычлан ача деч посна йокрок. Но нуно тыге кӱлеш, ачашт ешыж верч тырша манын умылат. Сандене ачашт мӧҥгыштӧ улмо годым эре йыржак шӱраҥыштылыт. Тыгай годым кажне кастене манме гаяк жапым еш дене эртараш тыршена. Пырля пазлым, легом погена, тӱрлӧ темылан мутланена. Пелашем книгам лудаш чот йӧрата, поснак – фантастике сынаным. Даниил эргынат сылнымутлан шӱман. Тудо кажне кечын малаш вочмо деч ончыч иктаж-могай йомакым лудаш йодеш, –каласкала О.Домрачева.
Пашалан изинек тунемыт
Домрачевмыт марий ешыште його койышым огыт йӧрате. Ача-ава икшывыштым изинек пашалан туныктат. Йоча-влак пӧртымат эрыктат, кӱмыж-совламат мушкыт, эсогыл кочкашат шолтат.
– Иктаж-мом кочмышт шуэш гын, мыйым огыт йод, чыла шке ямдылат. Полина жаритлыме пареҥгым тамлым ышта. Егор эргына мелнам кӱэшт кертеш. Руашым шке луга, жаритла. Мый але ачаже, конешне, тидын годым эскерен шогена. Тул содыки модыш огыл. Микроволновкеш кексым шкеак кӱэштыт. Кызыт интернет полшымо дене могай гына рецептым муаш ок лий?! Икманаш, йолагай огытыл, – манеш Ольга.
Ача-ава коклаште йӧратымаш, пагалымаш улыт гын, икшыват пиалан кушкеш, шке сеҥымашыж дене куандараш тырша. Шуко шочшан Домрачевмыт ешыште ача-ава да йоча коклаште кыл пеҥгыде.
Еш альбом гыч налме фото.