«Воштылаш, товатат, сулык огыл…» конкурсышто Советский район Кужмара села гыч Вера Мочаева ден Валентина Ефремова шуко гана сеҥышыш лектыныт. Нунын шындыме кеч-могай мыскарашт кеч-кӧмат воштылаш таратат. Моткоч уста, сайын модшо участник-влак улыт.
– Кӧ гай мыскараче улам, ойленат ом мошто. Ачам ден авамат пешыже тыгай лийын огытыл. Очыни, авам велым кочам гай улам. Тудо уста гармоньчо ыле. Советский районысо эмлымверыште ятыр ий санитаркылан ыштем. Кызыт пенсийыште улам гынат, пашаш коштам.
«Воштылаш, товатат, сулык огыл…» конкурсышто иктаж 10 гана участвоватленна, очыни. Икымше гана «Призывник» мыскарам модын ончыктышна. Ой, кузе чот ойгыренам ыле. Тунам ме икымше верыш лекна. Тынар ий жапыште шуко пӧлекым: кум телевизорым, микроволновкым, телефоным, тумо вочкым (тушто окса лийын) – налынна. Теният конкурсыш ушнаш ямдылалтына.
Мый шуко гана пӧръеҥым модынам. Рольыш пурет гын, тыгай образым почын пуаш неле огыл, – мане В.Д. Мочаева.