Параньга район Элпанур ялысе книгагудышто 2015 ийыште «Унавий» клубым чумырымо. Тудым книгагудым вуйлатыше Ольга Романовна Янышева вуйлата. Тушко илалше, пенсийыш лекше тале кидмастар-влак арнялан ик гана погынат да тӱрлӧ кидпашам ыштат. Мобилизацийым увертарымеке, нуно СВО-што улшо-влаклан меж носким пидаш тӱҥалыныт.
Параньга район Элнет почиҥга ялеш шочын-кушшо, Элпанур ялеш ешым чумырышо Ольга Янышева книгагудышто ятыр ий пашам ышта. Тудын тыршымыж дене «Унавий» клуб ышталтын. Кызыт тушко мастар кидан 16 еҥ коштеш да йӧратыме пашажым шукта. Икте пидаш, весе тӱрлаш тале. Тӱҥжӧ: тыште илалше еҥ-влак икте-весе дене чоным почын мутланен, тӱрлӧ темым каҥашен кертыт.
«Унавий» клубын участницыже-влакын пашаштым районысо, республикысе выставкылашке ик гана веле огыл аклаш колтымо. Сандене паша лектышышт уло.
Клубын участницыже-влак поро кумылышт дене ойыртемалтыт. Мобилизаций тӱҥалмеке, СВО-шко кайыше рвезе-влаклан 23 мужыр носким пидын пуэныт. Варажым ты пашалан эше утыр кумылаҥыныт.
– Меж шӱртым мыланна верысе предприниматель-влак Надежда Петровна ден Олег Арсентьевич Автономовмыт пуэныт. Умылен моштышо, поро кумылан улыт. Могай шӱртӧ, мыняр кӱлеш – эре йодынак шогат. Тыге полшен шогымыштлан поснак кугу таум ойлем.
Мыланна верысе шоҥгыеҥ-влакат полшеныт. Нуно мемнан деч шӱртым налын каят да ик-кок мужырым пидын кондат ыле. Теве ик ӱдырамаш 17 мужыр носким пидын. Южо еҥ шке шӱртыжым кучылтын. Кевытыште налме ямде носким кондышо-влакат ятырын лийыныт. Чумыр ончалаш гын, чылаже ме 226 мужыр носким колтенна. Тений пытартышлан Луганскышке колтышаш кугу посылкыш носким, мочалкым, влажный салфеткым, шовыным да молымат пыштенна. Салтак-влак серышым моткоч вучат. Сандене носки дене пырля йоча-влакын серышышым колтымо.
Элпанур ял гыч чылаже индеш рвезе Украиныште кредалеш. Нунын коклаште эргымат уло.
Кеҥеж пагытыште клубыш огына погыно, сандене кызытеш ты пашам жаплан чарныме. Шыжым уэш пидаш тӱҥалына, – мане Ольга Янышева.
«Унавий» клубын участницыже-влак кӱлешан, поро пашам шуктымышт дене куандарат, салтак-влак верч лым лийде тыршат. Нунылан кид лывыргылыкым да тыгаяк пашаче кумылым тыланена.