Звенигово район Кокшайск селасе у врачебный амбулаторий пациент-влакым приниматла. Тудым «Модернизация первичного звена здравоохранения» регионысо проект почеш тений апрельыште чоҥаш тӱҥалыныт.
Жапше годым ты амбулаторийыште пашам ыштыше врач лийын огыл. Но 2012 ийыште тушко, Ижевскысе медакадемийым тунем пытарен, ты районыштак шочын-кушшо Е.В.Дмитриева «Земский доктор» программе почеш пашаш толын.
Амбулаторийын штатыштыже – пӱйым эмлыше врач, медшӱжар, фельдшер, физиопроцедур медшӱжар, дезинфектор, арулыкым эскерыше, водитель, оралтым шотышто кучышо пашаеҥ. Кокшайск села гыч веле огыл, пациент-влак эше вич ял ден посёлко гыч полышым йодын толыт: Таир, Шемшӱргӧ, Ялпай, Семёновка да Шуйко гыч. Ӱмаште «Модернизация первичного звена здравоохранения» программе почеш амбулаторийлан автомашинам ойыреныт. Ынде пациент-влакым специалист-влак дек приёмыш да моло тергымашке Звенигово олаш шупшыктымо, анализ-влакым кондыштарыме годым нелылык уке.
Кокшайскыште шошо гыч шыже марте калык поснак шуко. Тышке Йошкар-Ола гыч канаш толыт, ятыр еҥ селаште дачым куча. Садлан ты пагытыште амбулаторийын пациентше-влак кок пачаш шукемыт. А эше ФАП-ште аптеке лиеш. Тидымат верысе калык поснак вучен.