Кажне каныш кечылан Анастасия Апакаева Йошкар-Ола гыч Морко районысо шочмо Мазиково ялышкыже вашка. Эр шошо гыч шыже марте тудо чодыраште, пасулаште жапым эртара – кушкыл-влакым пога. Нунын дене тамле да пайдале чайым ямдыла.
«Тыгай койыш мыйын – изиэм годсек. Эртен кайыше еҥ, пошкудо-влакым кудывечыштына чай дене сийленна. Кеҥежым ачам дене пӱртӱс лоҥгашке походыш чӱчкыдын коштынна. Котелокеш снеге чайым шолтенна, тушко эше пӱнчӧ укшым ешаренна. Кастене мӧҥгыштӧ еш дене пӱртньык, матрушка чайым йӱаш йӧратенна», – каласкала Настя. Тылеч вара тӱрлӧ шудым эре пога.
А.Апакаева профессийже дене – химик, МарГУ-со биологий да химий факультетым тунем пытарен. Йошкар-Оласе «ТЭЦ-1» предприятийыште инженер-химиклан пашам ышта. «Чайгоркаште чӱчкыдынак тамле чайым огыл, а химийым ужам. 2016 ий кеҥежым вуйдеҥгым (иван-чай) икымше гана коштен онченна. Тунамак умыленам: шудым тыглай гына коштыман огыл, а ферментаций технологийым палыман да шотыш налман», – манеш тудо.
Кызыт Настян шке ремесленный производствыжо уло. Тудо чай-влакым индивидуальнай заказ почеш чӱчкыдын ямдыла. Кум тӱрлӧ шудо гыч шогышо ассортиментшат ятыр. Лыпландарыше чайым эн чот йодыт. Тушко пӱртньыкым, матрушкам да вӱршудым пышта. Витаминан чай (шуанвондо, олма да чодыра емыж-влак) чылалан пайдале. Тазалыкым пеҥгыдемдыше шудо-влакымат ямдыла. Мутлан, вергылан пӧчыж, модо да снеге лышташ пайдале лийыт. Пызлышудо (пижма), арымшудо да гвоздике организм гыч паразитым луктыт. Вуйдеҥге ден лемограсс але вуйдеҥге ден лимон цедра икте-весышт дене сайын келшен толыт, нуно вий-куатым ешарат. «Южыжо икмыняр тӱрлӧ чайым налын кая, иктеш шолтен йӱэш, тамле манеш. Но мый чылт пырля ушаш лийдыме кушкыл-влакым ом кучылт гынат, тыге ыштыме организмлан сайжак огыл», – ойла А.Апакаева.
Мо оҥайже, Настя тылзымат шотыш налаш темла.
Умбакыже – 18 июньысо номерыште.