Морко район Красный Стекловар посёлко гыч Анастасия пытартыш пел ий пуйто шучко омышто гай ила. Мобилизаций тӱҥалмеке, Амир пелашыжым специальный военный операцийыш наҥгаеныт. Тений апрельыште пӧръеҥ сӧй пасуэш вуйым пыштен. Но капшым але мартеат шочмо мландыш конден тойымо огыл.
Йӧратыме пелаш да ача
Настя ден Амир Красный Стекловар посёлкышто палыме лийыныт – тунам Настя йолташ ӱдыржӧ дене пырля тушко уналыкеш толын улмаш.
– Амирын поро да весела улмыжо иканаште кумылем савыреныт. Еҥ тӱшкаште шкенжым туге кучен моштен, тудым эре ончымет гына шуэш ыле. Икымше вашлиймаш деч вара телефон дене ятыр кутыренна, келшаш тӱҥалынна, сӱаным ыштенна. Кок икшывыланна эн сай ача лийын, – шарналта ӱдырамаш.
Амир чоҥымо пашаште тыршен, бригаде дене пура-влакым нӧлтеныт. Настя ик жап Звенигово район Шолэҥерыш совхозыш пашаш кудалыштын. Вара шке посёлкысо школыш куснен, кызытат тушто поварлан пашам ышта.
Амир Волковлан повестке 2022 ий октябрьыште толын. Настя шортын, а пӧръеҥ тидлан ямде лийын. Повесткым огыт колто гынат, мый шке кумылын порысем шукташ каем ыле манын каласен вараракшым пелашыжлан. Ульяновск олаште учебкым эртымеке, 2023 ий январь гыч – СВО кайыме верыште. Тылеч вара кок гана мӧҥгыжӧ отпускыш толын каен.
Ешыж деч шылтен
– Лисичанский направленийыште порысшым шуктен. Армийыште стратегический назначениян ракетный войскаште служитлен, садлан СВО-што изирак сержант званиян лийын. Кертмыж годым мӧҥгӧ йыҥгырташ эре тыршен, видеойыҥгыр денат чӱчкыдын кутырымо. Южгунам арня-кок арня наре кыл лийын огыл. Вара йыҥгырта да «Илем, таза улам» манын ойла ыле. Йоча-шамыч дене эре мутланен.
Пытартыш гана тений 9 апрельыште эрдене йыҥгыртен. Тунам пашаш вашкем ыле, садлан кужун кутырен кертын омыл. Тидлан кызытат ӧкынем. Йоча-шамычым йодын, эргына школышто, ӱдырна йочасадыште лийыныт. Вес вере куснышаш улына манын палдарен. Штурмлан ямдылалтмышт нерген ик мутымат луктын огыл. Вара гына пален налынам: 9-21 апрельыште прорыв лийын. А 8 апрельыште йолташыжлан йыҥгыртен да штурмыш каена, тольык нигӧланат ит ойло, мӧҥгыштат тидын нерген огыт пале манын каласен. Тудо кечынак акажлан видеокыл дене йыҥгыртен, племянникше-влак дене кутырен, – каласкала Настя.
«Амир колен, маныт, чынак мо?» йодыныт 18 апрельыште Настя деч пошкудыжо-влак. Тунам самырык ӱдырамаш манеш-манешлан ӱшанымаш уке, мыланем нигӧ нимом ойлен огыл манын гына пелештен. Но чонжылан чот йӧсӧ лийын. Икмыняр кече гыч тудо пелашыж дене пырля служитлыше салтаклан йыҥгыртен да «Волков Амир – «груз 200» мо?» йодын. «Туге» манын каласыме вашмутлан ӱшанымыже шуын огыл. Эше икмыняр кече гыч Никита тукым изаж деч йыҥгыртен умылкален, тудымат мобилизоватленыт, Амир дене ик подразделенийыште служитленыт, пырля иленыт.
«Шӱгарышкыже миен, шортынат ом керт»
– 18 октябрьыште пелашемын колымыжлан – пел ий. Но капше кызытат сӧй пасушто кия, луктын огыт керт. ДНК экспертизым ышташ материалымат сдатленам – капшым лукташ лиеш гын, тудак манын пален налмеке, шочмо кундемышкыже колтышаш улыт. А кызыт пелашемын шӱгаржат уке – тушко миен, чон йӧсем дене мӱгырен шортынат ом керт, – ойла Настя.
10 ияш Тагир ден 6 ияш Диляра ачашт уке лийме нерген палат, чыла умылат. Тагир койышыж дене – чылт ачаже гын, Диляра тӱжвал тӱсшӧ дене ачаж могырыш каен. Чон сусырым тарваташ огыл манын, мӧҥгыштышт ты темым тарваташ пешыже огыт тырше.
Куд тылзыште Настя шкалан шке ӱшанаш тунем шуынам манеш. Амирын акажын ешыж дене кылым кучат, кӱлеш годым нунылан миен эҥерта.
– Колымыж почеш омым ужынам. Пуйто Амир мыланем кидшым ончыкта да «Ужат, кидем верыштак» манеш. Тыйже коленатыс манын йодмемлан «Уке, мый госпитальыште эмлалтам» лийын вашмут.
Эше палыме ӱдыр пелашемым омешыже ужын: пуйто Амир посёлкышто илыше йолташыж дене кутыра. А саде йолташыже омым ужмо деч икмыняр кече ончыч колен ыле. «Тый декет эн ончыч толынам, мӧҥгыштӧ эше огытат пале», – манын йолташыжлан, – шинчавӱдшым ӱштылын, каласкала ӱдырамаш.
Кызыт Настя машинам виктараш автошколышко тунемаш коштеш. «Амир оксам колтен да шкаланет келшыше машинам нал манын. Машинам налме, ынде вашке праван лиям», – манеш самырык ӱдырамаш.
СВО-ш кайымыж деч ончыч пӧръеҥ илыме пӧртышт воктене пу пӧртым нӧлтен шуктен, кӧргыштӧ отделке паша ынде шке жапшым вуча.
СВО-што Амир «Физрук» позывной дене коштын. Шкаланже тыгай позывнойым тудо арам огыл ойырен – Оршанкысе шуко профилян колледжыште физкультурым туныктышо специальностьлан тунемын. 2022 ий октябрьыште колледжыш тунемаш кайышаш да диплом пашажым аралышаш ыле. Шке посёлкысо школышто йоча-влакым спортлан шӱмаҥдаш шонен. Но шуктен огыл – повестке толын. Спортым йӧратымыжым да специальный военный операцийыште лӱддымӧ лиймыжым ятыр наградыже шарныктат.
Еш альбом гыч налме фото-влак.