Свердловск областьысе Красноуфимск район Кугу Тавра ялыште шочшо да кызыт ты кундемысе Полевской олаште илыше Татьяна Жаркова ӱштым куышо мастарыш савырнен.
Ты кидпашам ӱдыр куд ий ончыч тӱҥалын. Тыгай кумылым марий лӱман Анавий кугезе коваже шочыктен. Лач тудын моторын ыштыме ӱштӧ-влакым Татьяна шондыкыштыжо муын.
– Кугезе ковамын пашаже волгыдо тӱсан шӱртӧ дене куымо да узор-влакын икте-весе дене сӧралын ончалтмышт дене путырак чонемлан келшен. Тудым 1970-ше ийлаште ыштыме. Тунам нуным мужыр дене шочшо-уныка-влаклан ямдыленыт. Кидышкем ӱштӧ-влак логалмеке, мыят тиде мастарлыклан тунемаш шонен пыштышым. Вет тыште тӱсым ойырен налын моштымо, бисерым да моло сӧрастарыме наста-влакым кучылтмо – ик арверыште чыла шотыштат гармонийым ужынам. Тыгайым марий калыкын вургемже дене пырля гына огыл, кызытсе денат чияш шотлан толеш. Моткоч оҥайын да сылнын коеш, – каласкала Татьяна.
Ӱштым куымаште ӱдыр изи оҥа-влакым кучылтеш. Тидлан пластик гыч ыштымыже йӧнанрак улыт.
Т.Жаркова кодшо ийын шыжым «Марий вургем пайрем унала ӱжеш» конкурслан марий курчак-влакым ыштен конден. А шукерте огыл Российысе «Русь мастеровая» конкурсышто участвоватлен да III степенян лауреат лийын.
Ик ӱштым Татьяна ныл шагатыште куаш тунемын. Вара кажныже тӱрлӧ сыным налже манын, тӱрлӧ семын сӧрастараш тырша. Ожнысо семынат, стилизованныйымат ышта, тыгак кидшолым, закладкым, курчак-влаклан ӱштым да тасма сынан моло арверым ямдыла.