Йошкар-Оласе прокуратурышто оласе прокурорын сомылжым шуктышо Ю.Фадеев совещанийым эртарен. Тушто Марий Элын Тӱвыра, печать да калык-влакын пашашт шотышто министерствын, Росимуществын Марий Элысе управленийжын, Россий ФСИН-ын Марий Элысе управленийжын да Йошкар-Ола администрацийын еҥже-влак лийыныт. Нуно тӱвыра поянлык объект-влакым шотышто кучымо нерген каҥашеныт.
Совещанийын участникше-влак тыгай тӱшкаш пурышо шуко пачеран пӧрт шотышто могайрак ситуаций улмо, тудым шотышто кучаш могай паша ышталт шогымо нерген ойленыт. Нуно ынышт шалане манын, икмыняр мерым темленыт. Тыгак оласе ик объектым капитально олмыктымо кӱчык жапаш программыш пурташ документым ямдылаш кутырен келшеныт. Тудын шукталтмыжым республикысе прокуратур орган-влак терген шогаш тӱҥалыт.