Йошкар-Олаште С.Г.Чавайн лӱмеш Национальный книгагудо ончылнысо пече меҥгышке А.С.Пушкинын сынжым ончыктышо сӱрет кузе логалын? Волков уремысе 164-ше номеран да Пушкин уремысе 15-ше номеран пӧртласе пырдыжлаште мамонтым да Юмынӱдырын сынжым кӧ сӱретлен? А оласе кӱвар-влак пелен – юзо колым да мифысе гриффоным? Цемент дене ыштыме сӱретан панно-влакым (сграффитом) рӱдолаште шым вере ужаш лиеш. Нунын «озашт» – художник-монументалист Кирилл Романов.
– Урем пырдыжлаште шке семын сӱретлаш ок лий, маныт – закон чара! Тиде «ок лийже» мыйым «чыгылтара» веле. Сӱретан панно-влакым ола уремлаште пижыктылмем годым мый вий-куатым налам, кумыл нӧлтмым, адреналиным шижам! Ончыч кугурак-влак ойлат ыле, пуйто жап эртыме семын тыгай койыш йомеш. Но мый утларак да утларак веле шӱмаҥам докан, – шыргыжалын ойла художник-монументалист.
Уремлаште йышт сӱрет-лымаш – шала койыш такшым. Но Кириллын кидпашаже-влакым ужын, шукынжо куанат веле. Нуно оланан сынжым нигузе огыт локтыл, мӧҥгешла, оҥайракым веле ыштат. Очыни, санденак рвезе ола уремлаште сӱрет-влакым пижыктылме пашажым «Культурный вандализм» манын лӱмден.
Питерыште да тыште
Сграффитом Кирилл эн ончыч Санкт-Петербургысо уремлаште ыштеден. Тиде олашке рвезе Йошкар-Оласе художественный училищым тунем пытарымеке миен, ик жап тысе сымыктыш академийыште шинчымашым поген. Академийым тичмаш тунем лектын огыл гынат, Санкт-Петербург тудлан усталык шӱлышым пуэн.
– Сӱретче да монументалист семын тичмаш образованием – 10 ий. Мый мозаике, фреске сынан сӱретым ыштен кертам, тыгак чыла тӱрлӧ йӧн дене сӱретлем. Туныктышем – элнан ик эн тале сӱретче-монументалистше Андрей Иосифович Ларионов.
Санкт-Петербургышто посна шӱлыш озалана, ты олан сынже мыйын кумылем дене келшен толеш. Йошкар-Олаште ты шотышто вес семынрак. Ятыр жап шонаш логалеш: могай сӱретым да кушко келыштараш. Ондак эскерем, верым кычалам, вара могай лийшаш лопкытым да кӱкшытым вискалем. Мастерскойышто ужаш-влакым ямдылемат, палемдыме верышкем толам да пижыктен кодем.
Ойлымо йӧн – сӱрет
– Еҥ-влак илат, пашаш коштыт, ешаҥыт, могай-гынат сомылым ыштат. Тыге шке жапыштым эртарат. А ты тӱня гыч кайымеке, мо кодеш? Тукымым шуена лийже, но пашанам ончен, мемнам шарналтат гын, куанат гын, илыме ӱмырнан лектышыже сайрак лиеш огыл мо? Мый шке илышем пайдалын илен эртарынем.
Шонымашем-влак улыт. Уло, мом тӱнялан ойлаш. Мутмастар-влак шонымашыштым мут полшымо дене почын пуэн кертыт гын, мемнан, сӱретче я кидмастар-влакын, тыгай йӧнна – сӱрет, – мане Кирилл.
Кумданрак 23 апрельыште лекше номерыштына лудса.