22 мартыште Я.Эшпай лӱмеш кугыжаныш марий филармонийыште «Шошымсо Йошкар-Ола» фестиваль почылтеш. Тудо кажне ийын эртаралтеш.
Фестиваль годым ныл тӱрлӧ жанран концертым эртараш палемдыме. Тудым пайремлын почмаште Мордовий Республикысе С.Балабан лӱмеш «Разгуляй» казак мурымаш да куштымаш ансамбль мастарлыкшым ончыкта. Артист-влак «Инзерский рубеж» программым ямдыленыт. 29 мартыште «Ильц ден Петров» дуэт выступатла. Нунын «Однажды вдвоём» у проектышт отечественный да йотэлысе музыкын ик эн чапле произведенийыштлан шотлалтеш. 5 апрельыште «Марий Эл» кугыжаныш куштышо ансамбль шӧртньӧ фондышкыжо пурышо репертуар дене куандара. Фестивальым 6 апрельыште Нижний Новгород оласе Каменный хорын концертше дене мучашлат.