Теле кече касвелыш тайнен гынат, кава яндар. Уремыште йӱкшемден. Кечывалым левыше лум ӱмбалым вичкыж ий леведын. Тушто йоча-шамыч йывыртен куржталыт. Нуно кечыгут мландӱмбалым ырыктыше да шинчам йымыктарыше кече велыш кидыштым саҥгашкышт тушкалтен ончыштыт. Кечыжат вашкерак лумым левыктен, вӱдыш савырен, коремла дене поктен колтынеже. Шӱлыкан ялым, Кӧгерчен курыкым, Киебак эҥерым, олык лапым теле дечын утарынеже. Тудо сылне шошо толмым, лышташан пушеҥгым, ужаргыше нӧргӧ озыман пасум, шокшо кечыйол ваштареш топланыше курык тайылым да лумтӱрчачам вашкерак ужнеже. Шокшо вел гыч пӧртылшӧ кайыквусын йӱкшым колнеже.
Йошкар кече кас кавам кужу жап волгалтарыш. Пытартышлан мамык гай лапчык-лапчык ош пыл-шамыч тул орала волгалтын кодыч да йомыч. Авана гае шокшо кумылан, мотор кече каватурыш нушкеш, алже каен. Теве тудо чодыра шеҥгеке шылын утлыш. Йырваш пычкемыш лиеш. Яндар каваште шокте гай шӱдыр-влак кышкалалтыч. Эркын сорла тылзе нӧлталалте, уремыште кечывал кече гае волгыдо лие. Тыште да тушто шылт-шолт йӱк йоҥга. Южо вере капка «кочырик» шоктен почылтеш, «кроп» шоктен петыралтеш. Адакат ик жап тымык лиеш. Уэшлан йӱштӧ кугызайын шулышыжӧ шижалтеш. Йӱдлан тудо тӱтан пораным тарватышын коеш, но кечывалым шокшо кечын пӱсӧ йолваже деч лӱдыеш.
Йӱштӧ теле эрталеш, сылне шошо пӧртылеш. Вучыза! Вашлийза! Куаныза!
Зоя Тимирбаева-Аршаш.
Нефтекамск ола.